Bank sektorunun 4 aylıq xalis qazancı açıqlandı

Azərbaycanın bank sektoru bu ilin yanvar-aprel aylarında 347,9 milyon manat xalis mənfəət əldə edib. Halbuki, sektor ötən ilin eyni dövründən 57,1 milyon manat xalis zərərlə çıxmışdı.

Maliyyə Bazarlarına Nəzarət Palatasının aylıq statistikasına görə, 4 ay ərzində bankların faiz gəlirləri 644 milyon manat (illik müqayisədə 14,75% çox), faiz xərcləri 187,7 milyon manat (6,7% az), qeyri-faiz gəlirləri 250,3 milyon manat (57,1% çox), qeyri-faiz xərcləri 344,3 milyon manat (5,7% çox), aktivlər üzrə mümkün zərərlərin ödənilməsi üçün xüsusi ehtiyatların yaradılmasına ayırmaları 8,6 milyon manat (96,45% az), digər gəlirləri 21,7 milyon manat (12,8 dəfə çox), mənfəət vergisi ödəmələri isə 27,5 milyon manat (2,7 dəfə çox) təşkil edib.