Sığorta dəyəri

Sığorta müqaviləsinin bağlandığı günə sığortalanan əmlakın həqiqi dəyəri – 1) əmlakın sığorta müqaviləsinin tərəflərinin razılığı ilə müəyyən edilən, zədələnmiş və ya məhv olmuş əmlakın bərpa edilməsi dəyəri (bərpa dəyəri); və ya 2) eyni növdə, cinsdə, vəziyyətdə və keyfiyyətdə olan əmlakın əldə edilməsi dəyəri (bazar dəyəri); 3) yaxud həmin əmlakın balans üzrə qalıq dəyəri.

Misal:          

Şəxs öz mənzilini sığorta etdirmək istəyir və sığorta agenti və ya sığortaçının mütəxəssisi ona izah edir ki, mənzil onun həqiqi dəyərində sığortalanmalıdır. Buna görə də müstəqil qiymətləndiriciyə müraciət edilir və o, mənzilin bazar qiymətini 65 000 manat məbləğində qiymətləndirir. Bu məbləğ sığorta dəyəri adlanır. Sığorta müqaviləsində həmin dəyər sığorta məbləği kimi, yəni sığortaçının mənzillə bağlı öhdəliyinin ən yuxarı həddi kimi göstərilir. Mənzilinin sığorta müqaviləsi üzrə şəxsin əldə edə biləcəyi maksimal sığorta təminatı onun sığorta dəyərinə (65 000 manata) bərabər olacaqdır.

Azərbaycan Respublikasının Mülki Məcəlləsi, maddə 895.1:

Əmlakın sığortasında sığorta məbləği həmin əmlakın sığorta müqaviləsi bağlandığı andakı həqiqi dəyərindən - sığorta dəyərindən çox olduğu halda (ikili və ya çoxqat sığorta halında), həmin müqavilə sığorta məbləğinin sığorta dəyərindən artıq olan hissəsində etibarsızdır.

Belarus Respublikasının 1993-cü il 3 iyun tarixli “Sığorta haqqında” Qanunu, maddə 10:

Sığorta dəyəri (_рус.–cтраховая стоимость) (sığorta qiyməti (_рус–страховая оценка)) dedikdə, qanunvericiliklə başqa cür nəzərdə tutulmamışdırsa, sığorta marağı ilə əlaqəli olan əmlakın sığorta müqaviləsinin bağlandığı an tərəflərin razılığı ilə müəyyən edilən dəyəri başa düşülür.

Böyük Britaniyanın Dəniz risklərinin sığortası haqqında 1906-cı il Aktı, maddə 16-3:

Yüklərin və ya malların sığortası zamanı sığortalanmış əmlakın dəyəri ilə onun daşınma xərclərinin, həmçinin bütünlükdə sığortalanmaya çəkilən xərclərin cəmi sığorta dəyərini (_eng.–insurable value) təşkil edir.

Almaniya Federativ Respublikasının Sığorta müqaviləsi Aktı - 2008-ci il, maddə 88:

Başqa cür razılaşdırılmamışdırsa, sığorta dəyəri – sığortanın bir və ya bir neçə predmetə aid olduğu halda sığorta hadisəsinin baş verməsi zamanı sığortalının sığortalanmış əmlakı bərpa etmək üçün, köhnə və yeni arasındakı fərqdən irəli gələn azalmış bazar dəyəri çıxılmaqla çəkməli olduğu xərc məbləğidir.