Nvidia investisiya portfelinin 80%-ni SpaceX və Intel səhmlərinə yönəldib
ABŞ-ın çip istehsalçısı “Nvidia” şirkətinin investisiya portfelinin təxminən 80%-i “SpaceX” və “Intel” şirkətlərinin səhmlərindən ibarətdir.
ENA.az xəbər verir ki, The Motley Fool” nəşrinin yaydığı məlumata görə, 2026-cı ilin ikinci rübünün sonuna olan göstəricilərə əsasən, “Intel” portfelin 47%-ni, “SpaceX” isə 33%-ni təşkil edib. “Nvidia”nın açıqlanan səhm portfelinin ümumi dəyəri təxminən 63,4 milyard dollar olub.
“SpaceX”ə investisiyanın əsasında “Nvidia”nın daha əvvəl İlon Maskın süni intellekt şirkəti “xAI”yə yatırdığı vəsait dayanır. “SpaceX”in “xAI”ni satın almasından sonra bu investisiya “SpaceX” səhmlərinə çevrilib. Şirkətin kosmik texnologiyalar, “Starlink” peyk interneti və süni intellekt infrastrukturu sahələrində fəaliyyəti investorların diqqətini cəlb edir.
“Nvidia”nın “Intel”dəki payının dəyəri isə təxminən 30 milyard dollar olub. Şirkətlər daha əvvəl fərdi kompüterlər və məlumat mərkəzləri üçün çiplərin birgə hazırlanması istiqamətində əməkdaşlıq elan ediblər. “Intel”in gəlirlərində artım qeydə alınsa da, şirkət süni intellekt və prosessor bazarlarında rəqabətlə üzləşir.
Analitiklər bu investisiyaların süni intellekt infrastrukturuna tələbin artmasından faydalanmaq imkanları yaratdığını bildirirlər. Bununla yanaşı, “SpaceX” və “Intel” səhmlərinin yüksək qiymətləndirilməsi və texnologiya sektorundakı rəqabət investorlar üçün risklər yaradır.
