Neftin qiyməti təchizat narahatlığı ilə yüksəlib (15.09.2026)
Neftin qiyməti Səudiyyə Ərəbistanının enerji infrastrukturuna hücumların ölkənin əsas neft kəmərlərindən birinin fəaliyyətini dayandırması fonunda yüksəlib.
ENA.az xəbər verir ki, Brent markalı neftin qiyməti 1,18% artaraq bir barel üçün 106,93 ABŞ dollarına, WTI markalı neft isə 1,24% bahalaşaraq 102,65 dollara çatıb.
Qiymət artımına Səudiyyə Ərəbistanına yeni hücumlar və Körfəz ölkələrinin İranla planlaşdırılan danışıqları təxirə salması da təsir edib. Bu vəziyyət Orta Şərqdə münaqişənin genişlənməsi və qlobal neft tədarükünün azalması ilə bağlı narahatlıqları artırıb.
Səudiyyə Ərəbistanının Şərq-Qərb neft kəmərinin fəaliyyətində fasilə ölkənin gündəlik neft ixracının təxminən 4%-ni risk altında qoyur. Hürmüz boğazından keçən tanker və ticarət gəmilərinin sayının azalması da bazarda təchizat risklərini gücləndirir.
