Bakıda 1 milyon kv.m-lik tikinti obyektlərinin tikintisinə icazələr verilib
“Genişləndirilmiş səlahiyyətləri çərçivəsində Komitənin sərəncamları ilə 2019-cu il ərzində təsdiq olunmuş və ölkə üzrə tikintiyə icazələrin verilməsi üçün əsas olan 371 şəhərsalma əsaslandırılması ilə inşası nəzərdə tutulan tikinti obyektlərinin yerüstü mərtəbələrinin ümumi sahəsi 4.647.211 m2 təşkil edir ki, bu sahənin 2.520.808 m2 təşkil edən hissəsi mənzillər təşkil edəcək”.
“ENA” xəbər verir ki, bu, 24 yanvar 2020-ci il tarixində Dövlət Şəhərsalma və Arxitektura Komitəsində 2019-cu ilin yekunlarına həsr olunmuş geniş tərkibli kollegiya iclasında bildirilib.
Eyni zamanda, hesabat dövründə Komitə tərəfindən Bakı şəhərində ümumi sahəsi təqribən 1.000.000 m2 təşkil edən tikinti obyektlərinin tikintisinə icazələr verilmişdir.
Bununla yanaşı, hesabat dövründə Komitə tərəfindən Bakı şəhəri üzrə ümumi sahəsi 10.397.148 m2 təşkil edən tikinti obyektlərinin istismarına icazə verilmişdir, ki bu sahənin 7.154.015 m2 təşkil edən hissəsi mənzillərin payına düşür. Bunlardan ümumi sahəsi 9.532.857 m2, mənzillərin sahəsi isə 6.736.933 m2 təşkil edən yaşayış binalarının istismarına icazə Azərbaycan Respublikası Prezidentinin “Bəzi çoxmənzilli binaların istismarına icazə verilməsinin sadələşdirilməsi haqqında” 19.02.2019-cu il tarixli 529 nömrəli Fərmanına uyğun olaraq verilmişdir.
