“Google”un ana şirkətinin xalis mənfəəti 25% azalıb
“Google”un ana şirkəti “Alphabet”in gəlirləri 2026-cı ilin üçüncü rübündə ötən ilin eyni dövrü ilə müqayisədə 25% artaraq 127,6 milyard dollara çatıb. Bununla belə, şirkətin xalis mənfəəti təxminən 25% azalıb.
ENA.az xəbər verir ki, iyul-sentyabr aylarında “Alphabet”in xalis mənfəəti 26,2 milyard dollar təşkil edib. Ötən ilin eyni dövründə bu göstərici 35 milyard dollara yaxın olub. Səhm üzrə mənfəət də 2,87 dollardan 2,12 dollara düşüb.
Şirkətin əməliyyat gəlirləri 30% artaraq 40,6 milyard dollara yüksəlib. Bununla yanaşı, rüb ərzində sərbəst pul axını 9,1 milyard dollar mənfi olub.
“Alphabet”in baş icraçı direktoru Sundar Piçainin sözlərinə görə, süni intellektə yatırımlar “Google” axtarış sistemində sorğuların artımını dəstəkləyib. İllik müqayisədə axtarış sorğularının artım tempi son beş ilin ən yüksək səviyyəsinə çatıb.
Süni intellekt infrastrukturuna tələbatın artması “Google Cloud”un gəlirlərinə də təsir edib. Bölmənin gəlirləri 103% artaraq 30,7 milyard dollara yüksəlib.
Bundan başqa, “Gemini” tətbiqinin istifadəçilərinin sayı 1 milyarda çatıb. “YouTube Music” və “YouTube Premium” xidmətlərinin sınaq abunəlikləri də daxil olmaqla ümumi abunəçi sayı isə dünya üzrə 150 milyonu ötüb.
Beləliklə, şirkətin gəlirləri və bulud xidmətləri sürətlə böyüsə də, xalis mənfəətin azalması və mənfi sərbəst pul axını hesabat dövrünün əsas maliyyə göstəriciləri olub.
