ABŞ və Cənubi Koreya süni intellekt sahəsində 950 milyard dollarlıq əməkdaşlığa başladı

27 iyul 2026

ABŞ və Cənubi Koreya süni intellekt sahəsində əməkdaşlığı yeni mərhələyə keçirərək yüz milyardlarla dollar dəyərində layihələri əhatə edən strateji tərəfdaşlığa başlayıblar.

ENA.az xəbər verir ki, bu barədə Bloomberg məlumat yayıb.

Məlumata görə, Cənubi Koreya Prezidenti Li Ce Myunun (Lee Jae Myung) ABŞ-a səfəri çərçivəsində ölkənin aparıcı texnologiya şirkətləri ilə ABŞ-ın süni intellekt nəhəngləri arasında ümumi dəyəri 950 milyard ABŞ dollarına çatan əməkdaşlıq sazişləri və memorandumlar imzalanıb.

Ən böyük razılaşmalardan biri SK Group ilə Nvidia arasında əldə olunub. Tərəflər 500 milyard dolları aşan əməkdaşlıq çərçivəsində yüksək ötürmə qabiliyyətli yaddaş (HBM) texnologiyalarının hazırlanması və iri həcmli süni intellekt məlumat mərkəzlərinin yaradılması istiqamətində birgə fəaliyyət göstərəcəklər.

Bununla yanaşı, Samsung Electronics ilə Broadcom arasında da 200 milyard ABŞ dollarına qədər dəyəri olan anlaşma memorandumu imzalanıb. Saziş yaddaş çipləri, müqaviləli çip istehsalı (foundry) və qabaqcıl qablaşdırma texnologiyalarını əhatə edir.

Sammit çərçivəsində həmçinin "San Francisco AI Declaration" adlı birgə bəyannamə qəbul olunub. Sənəddə ABŞ və Cənubi Koreya arasında texnologiya sahəsində əməkdaşlığın dərinləşdirilməsi, süni intellekt infrastrukturuna investisiyaların artırılması və qlobal innovasiyaların təşviqi əsas prioritetlər kimi müəyyənləşdirilib.

Cənubi Koreya Prezidenti bildirib ki, ölkə süni intellekt texnologiyalarında qlobal liderlərdən birinə çevrilməyi hədəfləyir. Bu məqsədlə hökumət özəl sektorla birlikdə məlumat mərkəzlərinin genişləndirilməsi, yarımkeçirici istehsalının artırılması və yeni nəsil AI ekosisteminin formalaşdırılması istiqamətində iri həcmli investisiya proqramlarını həyata keçirəcək.

Səfər zamanı prezident Li Ce Myun Nvidia-nın baş icraçı direktoru Jensen Huanq, OpenAI rəhbəri Sem Altman, Anthropic şirkətinin rəhbəri Dario Amodei və digər aparıcı texnologiya şirkətlərinin rəhbərləri ilə də görüşlər keçirib.