Ən çox mənfəət götürən banklar hansılardır? - 22 BANKIN RENKİNQİ

Bank lisenziyasına malik 22 kredit təşkilatının açıqladığı rəqəmə görə, sektorun ümumi mənfəəti 1 milyard 120 milyon 801 min manatdır. 22 bankdan 21 bank 2024-cü ili mənfəətlə bitirib. Təmiz mənfəətin həcminə görə, 3 flaqman bank bunlardır: ABB, PAŞA Bank, Kapital Bank. Əslində, ÜÇLÜK artıq bir neçə ildir ki, bu sırada qərarlaşıblar. Ötən illə müqayisə yeganə fərq renkinqdə tutduğu yerə görə PAŞA Bank ilə Kapital Bankın sıralamasındadır.

PAŞA Bank onunla eyni Holdinqdə olan KapitalBankı ötüb. 

Mənfəətdən nə qədər pay götürdüklərinə baxsaq, kifayət qədər ciddi rəqəmlərdir. 3 bank ümumi mənfəətin 62 faizini götürüb - 690 milyon 771 min manat!  

Halbuki, 2023-cü ilin yekunları üzrə bu üç bankın xalis əməliyyat mənfəəti 764 milyon manat idi: ABB 322 milyon, PAŞA Bank 199 milyon, Kapital Bank 242 milyon manat. 

2024-cü il üzrə 5 bankın mənfəəti isə 807 milyon manatdır. Yəni ümumi məbləğin 72 faizi beşliyin büdcəsində oturub.

Yeganə zərər açıqlayan bank Bank BTB isə vergilər və bank fəaliyyəti ilə bağlı gözlənilməz xərclər ödənilənədək 4 milyon 134 min manat həcmində mənfəət əldə edib. Lakin gözlənilməz fəaliyyət növlərindən və əvvəlki dövr üçün uçotdakı dəyişikliklər bu bank üçün 4 milyon 973 min manat xərc yaradıb. Nəticədə bank yekunu 839 min manat zərərlə bağlayıb.