Ən böyük gəlir dövlət bankındadır. Gəlirlər nədən formalaşıb? - ABB-nin TƏHLİLİ

Azərbaycanın bankları arasında ən çox gəlir əldə edən dövlət bankı oldu. Azərbaycan Beynəlxalq Bankı 80 milyon 607.82 min manat mənfəət açıqlayıb.

Biznes kreditləri rekordda

Mənfəətin 209 milyon 525.15 min manatı faiz gəlirlərindən formalaşıb, o cümlədən 146 milyon 721.12 min manatı məhz kreditlər üzrə faizlərdən əldə olunub. Qeyri-faiz gəlirləri 67 milyon 635.56 min manatdır və ötən ilin müvafiq dövrü ilə müqayisədə 2 dəfəyə yaxın artım baş verib. Xüsusən də Bankın alınan haqq və komissiya gəliri 55 milyon 222.13 manata yüksəlib. Bu isə ötənilkindən 61,3% çoxdur. Xarici valyutalardan gəlir 2 milyon manat azalaraq 12 milyon 384 min manata düşüb. 
Faiz xərcləri 43 milyon 400.33 min manat olub. Bunun 32 milyon 288.72 min manatı depozitlər üzrə faizlərin ödənilməsinə yönəldilib. Qeyri-faiz xərcləri isə 96 milyon 595.17 min manat olub. Bank 31 milyon 799.29 min manatı ehtiyatlara ayırıb və 22 milyon 394.12 min manat dövlət büdcəsinə ödəmə edib. 

Gəlirləri necə formalaşıb? 

Azərbaycan Beynəlxalq Bankının aktivləri 2023-cü ildə böyük azalma göstərmişdi. Bu tendensiya bu ilin yanvar-mart aylarında da davam edib. Bu üç ayda aktivlər 3,6 faiz azalaraq 13 milyard 189,302.72 milyon manata düşüb. Azalmada ən böyük hissə - 500 milyon manat nağd vəsaitlərdə qeydə alınıb, həmçinin ABB-nin başqa banklardakı depozitlərinin həcmində azalma qeydə alınıb.  Ümumilikdə nağd vəsaitlər ümumi aktivlərin 27%-ni təşkil edir və 3 milyard 582 milyon 251.16 min manatdır. Müştərilərə verilmiş kreditlərin həcmində 300 milyon manatlıq bir artım qeydə alınıb və portfel 5 milyard 341 milyon 495.24 min manat təşkil edir. Ölkədə yeganə bankdır ki, son bir ildə biznes kreditlərinin həcmi istehlak kreditlərinin həcmini üstələyir və burada dövlət sifarişi ilə Qarabağda aparılıan tikinti-bərpa işlərinin böyük payı var. Beləliklə, biznes kreditləri - 2 milyard 637 milyon 473.10 min istehlak kreditləri 1 milyard 489 milyon 835.90 min manatdır, 1 milyard 214 milyon 186.24 min manat isə daşınmaz əmlak kreditləridir. 
 

Aktivləri azalıb

Bankın öhdəlikləri 11 milyard 296 milyon 917.66 min manat təşkil edir. Depozit portfelinin ümumi həcmi 4 milyon manat artaraq 9 milyard 490 milyon 179.83 min  manat olub. Ötən il SOCAR-a məxsus böyük həcmdə depozit aidiyyəti üzrə yönəldikdən sonra bankın depozit portfelində böyük həcmdə kiçilmə baş vermişdi, lakin son aylarda yenidən artım müşahidə edilirdi. 
Müştərilərin depozitləri və cari hesablarında 374 milyon 926.24 min manatlıq bir azalma “Pul hərəkəti” hesabatında öz əksini tapır. 
Lakin bu dəfə 72 milyon manatlıq azalma fiziki şəxslərin hesablarında qeydə alınır. Bankda hüquqi şəxslərin depozitləri 7 milyard 407 milyon 192.43 min manatdır və bunlar əsasən iri dövlət müəssisələrinin tələbli hesablarıdır. Bankın 500 milyon 484.80 min manatlıq borc qiymətli kağızlarının həcmində dəyişiklik yoxdur. Ötən müddətdə ABB-nin 1 milyard 225 milyon 647.82 min manat nizamnamə kapitalı dəyişməz olaraq qalıb. Rübün sonuna isə 457 milyon 460.92 min manat bölüşdürülməmiş mənfəəti var.