ABŞ-da buğdanın qiyməti bahalaşır. Qiymətlər üç həftənin maksimumuna çatıb
Cümə axşamı ABŞ-da buğda qiymətləri ardıcıl üçüncü sessiyada artıb və Rusiyanın taxıl müqaviləsini ləğv etməsindən sonra son üç həftənin maksimumuna çatıb.
ENA.az Trading Economicsə istinadən xəbər verir ki, Çikaqoda buğda üçün sentyabr müqavilələrinin kotirovkaları 1% artıb - buşel üçün 7,3525 dollara çatıb. Dünən ticarətin sonunda qiymətlər 8,5% artıb ki, bu da 2012-ci ildən bəri ən yüksək gündəlik artım idi.
Qarğıdalı üçün dekabr fyuçerslərinin qiymətləri 0,5% artıb - buşelə görə 5,5575 dollara qədər. Eyni zamanda, noyabr ayı tədarükü üçün soya müqavilələri ardıcıl beş seans yüksəldikdən sonra buşel üçün 0,2% azalaraq 14,0625 dollar olub.
Rusiya Müdafiə Nazirliyi çərşənbə günü Qara dənizin beynəlxalq sularında bir sıra dəniz ərazilərini naviqasiya üçün müvəqqəti olaraq təhlükəli elan edib.
Rusiya hərbçiləri bildiriblər ki, taxıl müqaviləsinin dayandırılması ilə əlaqədar Qara dənizdə humanitar dəhliz məhdudlaşdırılır və iyulun 20-də Moskva vaxtı ilə saat 00:00-dan etibarən Ukrayna limanlarına gedən bütün gəmilər potensial hərbi yük daşıyıcı kimi qəbul ediləcək.
Taxıl müqaviləsi 2022-ci il iyulun 22-də İstanbulda bağlanıb. Bazar ertəsi Rusiya prezidentinin sözçüsü Dmitri Peskov taxıl müqaviləsinə xitam verildiyini bildirib. Eyni zamanda o qeyd edib ki, razılaşmaların Rusiya hissəsi yerinə yetirilən kimi Rusiya dərhal bu sövdələşmənin icrasına qayıdacaq.
