“AzFinance”lər “Gilan Holding”in yerləşdiyi ünvandan çıxıb
Yarandığı gündən “Gilan Holding” MMC-nin yerləşdiyi ünvanda mənzillənən “Azfinance İnvestisiya Şirkəti” Qapalı Səhmdar Cəmiyyəti və ona yaxın şirkət rəsmi şəkildə həmin ünvandan çıxıblar.
ENA.az Banker.az-a istinadən xəbər verir ki, “AzFinance İnvestisiya Şirkəti” QSC və “AzFinance Asset Management” MMC Bakı şəhəri Yasamal rayonu, Nəriman Nərimanov Pr., ev 206, məhəllə 466-nı tərk ediblər.
Bu, “Capital Towers”in yerləşdiyi ünvandır və burada, “Gilan Holding” MMC-yə yaxın olan bir neçə törəmə şirkətlər hüquqi ünvan kimi qeydiyyatda idilər.
İki şirkət bundan sonra Bakı şəhəri Nəsimi rayonu, Cəlil Məmmədquluzadə, ev 102A ünvanında – “City Point” biznes mərkəzində fəaliyyətlərini davam etdirəcəklər.
“Azfinance İnvestisiya Şirkəti” QSC 1.55 milyon nizamnamə kapitalına sahibdir. Onun səhmləri 100%-i Abid Məmmədova məxsusdur. A.Məmmədov səhmdar olmaqla paralel, həmçinin “Azfinance Asset Management” MMC-nin direktorudur.
