Salyanda ilk dəfə salınan qoz bağı məhsul verib

Salyan rayonunda 3 il əvvəl ilk dəfə salınan qoz bağı məhsul verib. Qoz bağının məhz Salyanda salınmasının məqsədi Muğan-Aran rayonlarında bu sahənin inkişaf etdirilməsidir.

Fermerlər tərəfindən rayonun Ərəbqardaşbəyli kəndində salınan bağdakı ağac tingləri Türkiyədən gətirilib və əvvəlcə sınaqdan keçirilməsi üçün həyətyanı sahələrdə əkilib. İki il aparılan sınaqlar nəticəsində tinglərin bol məhsul gətirdiyini görən təsərrüfat sahibləri bu sahəni genişləndirmək qərarına gəliblər. Bağ salmaq məqsədilə kənd ərazisində 4,5 hektar torpaq sahəsi götürülərək qoz bitkisi üçün yararlı hala salınıb.

Ərəbqardaşbəyli kəndinin bələdiyyə sədrinin müavini Zülfüqar Ağayev deyir ki, bağda Türkiyədən gətirilmiş 1500-ə yaxın qoz tingi əkilib: “Ağaclar məhsuldardır, damlama üsulu ilə suvarılır. İlkin bar verib. Növbəti illərdə məhsul gözləyirik. Bağda 5-6 adam çalışır, ağaclara quluq olunur. Məhsuldarlıq artarsa, burada əhalinin köməyindən də istifadə etmək nəzərdə tutulur”.

İqlim şəraitinə uyğunlaşan yeni qoz ağacları yerli qozlardan bir sıra üstün keyfiyyətləri ilə fərqlənir. Belə ki, yumşaq qabığa, tərkibindəki yağ və yodun keyfiyyətinə görə digər sortlardan seçilir. Bundan başqa, yerli qoz ağacları 5-6 ilə, yeni sort qoz ağacları isə 2-3 ilə bar verir. Gələcəkdə məhsuldar tinglərin ərazidə yayılması və yeni qoz bağlarının salınması da nəzərdə tutulub. Salyanda ilk dəfə salınan qoz bağı bu gün bir çox yerli fermerin marağındadır.

Salyan Dövlət Aqrar İnkişaf Mərkəzinin böyük məsləhətçisi Şəhriyar İsgəndərovun sözlərinə görə, artıq fermerlər qoz bağlarının salınmasına böyük maraq göstərirlər. “Baxmayaraq ki, bu bitki Salyan üçün xarakterik sayılmırdı, amma indi maraq artıb. Onu da qeyd edim ki, yeni salınmış qoz bağlarında müasir suvarma üsulundan istifadə olunur. Bu da həm məhsuldarlığa, həm də suyun itkiyə getməməsinə səbəb olur”, – deyə o qeyd edib.

Mütəxəssislər bildirirlər ki, üçüncü-dördüncü ilində 70 kiloqrama yaxın məhsul gətirən bu tinglərdən 7-8 il ərzində 250-300 kiloqrama yaxın məhsul toplamaq mümkündür. Bol məhsul toplanandan sonra qozların yerli və xarici bazarlara çıxarılmasına başlanılacaq.