Yollardan ətrafa su və palçıq sıçradan sürücülərə - XƏBƏRDARLIQ

Yağışlı havalarda bəzi sürücülərinin diqqətsizliyi və avtomobili yüksək sürətlə idarə etməsi yolda olan suyun,  palçığın piyadaların və digər nəqliyyat vasitələrinin üzərinə sıçramasına səbəb olur. Bəs buna görə sürücüləri hansı cəzalar gözləyir?

"BI" xəbər verir ki, məsələ ilə bağlı Baş Dövlət Yol Polisi İdarəsinin İctimaiyyətlə Əlaqələr Şöbəsinin rəisi, polis polkovnik-leytenantı Rüfət Quliyev deyib ki, nəqliyyat vasitələrinin sürücüləri tərəfindən nəqliyyat vasitəsinin istismarı qaydalarının pozulması inzibati məsuliyyət yaradır. 

“Yollarda  piyadalara və  digər nəqliyyat vasitələrinə  qəsdən su və ya palçıq sıçradılmasına görə inzibati məsuliyyət nəzərdə tutulub. İnzibati Xətalar Məcəlləsinin 342.1.5-ci maddəsinə əsasən, su və ya palçığın yolda piyadalara, binalara və nəqliyyat vasitələrinə qəsdən sıçradan sürücülər 40 AZN məbləğində cərimə olunur”.

R.Quliyev deyib ki, sürücülər bu cür qayda pozuntularından çəkinməlidirlər:

“Belə kobud davranışla üzləşən piyadalar avtomobilin dövlət nişanını, markasını, rəngini, hadisənin harada və nə vaxt baş verdiyi haqda məlumatları əldə edərək, polis bölməsinə və “902 qaynar-xətti”nə müraciət edə bilərlər”.

Rüfət Quliyevin sözlərinə görə, Dövlət Yol Polisi hər zaman olduğu kimi sürücülərə xəbərdarlıq edir ki, yollarda diqqətli olsunlar, yol hərəkəti qaydalarına ciddi qaydada riayət etsinlər.

“Təbii ki, sürücülər hava şəraitini nəzərə alaraq mütləq ara məsafəsi saxlamalıdırlar. Ehtiyac olduqda idarə etdikləri nəqliyyat vasitələrinin qabarit işıqlarından istifadə etməlidirlər”.