Azərbaycanlı turistlərin Gürcüstanda xərcləri kəskin artıb
Bu ilin ikinci rübündə Gürcüstana səfər edən azərbaycanlı turistlərin orta xərcləri 416 lari (140 dollar) təşkil edib.
Bu barədə Gürcüstanın Milli Turizm Administrasiyasının rüblük araşdırmasında bildirilib.
Rüblük müqayisədə azərbaycanlı turistlərin qonşu ölkədəki orta xərclərində 150,9 lari və yaxud 57% artım qeydə alınıb.
Artımın olmasına baxmayaraq, hesabat dövründə Azərbaycan vətəndaşları Gürcüstanda bu ilin birinci yarısında ən az pul xərcləyən turistlər olub.
Araşdırmaya əsasən, aprel-iyun aylarında Gürcüstanda ən çox pul (1 580 lari/532 dollar) rusiyalı turistlər xərcləyiblər. Türkiyə və Ermənistandan olan turistlərin orta xərcləri isə müvafiq olaraq 1 003 lari (338 dollar) və 630 lariyə (212 dollar) bərabər olub.
Qonşu ölkəyə bu ilin ikinci rübündə səfər edən əcnəbi ziyarətçilərin xərcləri, ümumilikdə, 2,4 mlrd. lari (808 min dollar) təşkil edib. Turistlər bir səfər ərzində orta hesabla 1 261,6 lari (424 dollar) xərcləyiblər.
Xərclərin 24,7%-i qida və içkilər, 24,5%-i yerləşmə, 23,4%-i mədəni və əyləncə xidmətləri, 18,6%-i alış-veriş, 6,8%-i yerli nəqliyyata, 2%-i isə digər xidmətlərə sərf olunub.
Aprel-iyun aylarında Azərbaycandan Gürcüstana 329 815 nəfər səfər edib. İllik müqayisədə bu göstərici 4,3% artıb. Azərbaycanlı turistlərin 94,3%-i qonşu ölkəyə təkrar, 5,7%-i isə ilk dəfə səfər edib.
Azərbaycanlı turistlərin Gürcüstanda gecələmə müddəti orta hesabla 2 gün təşkil edib.
Qonşu ölkəyə səfər edən əcnəbilərin 58,7%-i səfərindən çox razı, 31%-i razı qalıb, yalnız 0,2% isə müvafiq suala cavab verməyib.
