Bankların 62,5 milyard manatlıq aktivləri harada "yatır"? - CƏDVƏL
31 avqust 2026-cı il tarixinə Azərbaycanın bank sektorunun cəmi aktivləri 62,48 milyard manat olub. Bu, iyulun sonundakı 60,98 milyard manatla müqayisədə 1,50 milyard manat və ya 2,5% artım deməkdir. İlin əvvəlindən isə aktivlər təxminən 5,39 milyard manat və ya 9,4% böyüyüb.
Amma daha maraqlı məqam aktivlərin nədən ibarət olmasıdır.
|
Aktiv maddəsi |
31.08.2026 |
Cəmi aktivlərdə payı |
|
Müştərilərə verilən kreditlər |
32,82 mlrd manat |
52,5% |
|
Qiymətli kağızlar |
9,07 mlrd manat |
14,5% |
|
Maliyyə institutlarındakı depozitlər |
6,00 mlrd manat |
9,6% |
|
AMB-də müxbir hesablar |
5,20 mlrd manat |
8,3% |
|
Digər aktivlər |
5,64 mlrd manat |
9,0% |
|
Nəğd vəsaitlər |
2,19 mlrd manat |
3,5% |
|
Nostro hesablar |
1,87 mlrd manat |
3,0% |
|
Maliyyə institutlarına kreditlər |
0,63 mlrd manat |
1,0% |
Ən diqqətçəkən dəyişiklik: qiymətli kağızlar
Bankların qiymətli kağızlara yatırdığı vəsait iyulun sonunda 7,95 milyard manat olduğu halda, avqustun sonunda 9,07 milyard manata yüksəlib. Yəni cəmi bir ayda 1,12 milyard manat vəya 14,1% artıb.
Daha maraqlısı odur ki, eyni dövrdə müştərilərə verilən kreditlər 32,10 milyard manatdan 32,82 milyard manata, yəni 728,9 milyon manat artıb. Deməli, avqust ayında bank aktivlərinin ümumi 1,50 milyard manatlıq artımının təxminən 75%-i kreditlər və qiymətli kağızlar portfelinin artımının hesabına formalaşıb.
Banklar kredit verməkdən əlavə, 9 milyard manatlıq qiymətli kağız portfeli saxlayır
Bu rəqəm bank sektorunun aktivlərinin strukturunu anlamaq üçün vacibdir. Hazırda bankların 32,8 milyard manatı müştəri kreditlərində, 9,1 milyard manatı qiymətli kağızlarda, 6,0 milyard manatı maliyyə institutlarındakı depozitlərdə, 5,2 milyard manatı Mərkəzi Bankdakı müxbir hesablarda yerləşir. Başqa sözlə, bank aktivlərinin yalnız təxminən yarısı müştərilərə verilmiş kreditlərdən ibarətdir. Kreditlər 52,5% paya malikdir, qalan hissədə isə likvid və investisiya xarakterli aktivlər əhəmiyyətli yer tutur.
Maraqlı detal
Qiymətli kağızlar portfelinin 4,01 milyard manatı xarici valyutadadır. Bu, ümumi qiymətli kağızlar portfelinin təxminən 44%-nə bərabərdir. Müştəri kreditlərində isə xarici valyuta ilə verilən kreditlərin həcmi 5,45 milyard manat, yəni kredit portfelinin təxminən 16,6%-dir.
41,8 milyard manatlıq depozit portfeli
Bank aktivlərinin maliyyələşmə tərəfinə baxanda əsas mənbə yenə depozitlərdir.
31 avqustda bankların depozit portfeli 41,79 milyard manat olub və ümumi öhdəliklərin 76,4%-ni təşkil edib. Bunun 23,98 milyard manatı hüquqi şəxslərin, 17,81 milyard manatı isə fiziki şəxslərin depozitləridir.
