Rusiyada yanacaq qıtlığı yenidən dərinləşir

Rusiyada ötən ay müəyyən qədər səngiyən yanacaq çatışmazlığı yenidən dərinləşib. Ölkənin müxtəlif bölgələrində benzinə çıxış çətinləşib, bəzi yanacaqdoldurma məntəqələrində isə satışa məhdudiyyətlər tətbiq olunur.

ENA.az xəbər verir ki, bu barədə Bloomberg HT məlumat yayıb.

Sürücülərin yanacaqdoldurma məntəqələrindəki vəziyyətlə bağlı məlumatlarını təhlil edən GdeBENZ platformasının məlumatına görə, avqustun 16-na benzin və ya dizel yanacağının mövcud olduğu bildirilən məntəqələrin ölkə üzrə payı avqustun 9-dakı 41%-dən 28,1%-ə düşüb.

Bəzi yanacaqdoldurma məntəqələrində yanacağın tamamilə tükəndiyi, digərlərində isə uzun növbələrin yarandığı və satış limitlərinin tətbiq olunduğu bildirilir. Problem xüsusilə Rusiyanın cənubunda, Volqaboyu regionunda və bəzi mərkəzi bölgələrdə daha ciddi xarakter alıb.

Bəzi bölgələrdə yanacaq satışına limit qoyulub

Rusiyanın Orenburq vilayətində avqustun 12-dən etibarən yanacaq satışına yenidən geniş məhdudiyyətlər tətbiq olunub. Vilayət rəhbərliyinin qərarına əsasən, avtomobillər nömrələrinin son rəqəminin tək və ya cüt olmasına uyğun olaraq müəyyən günlərdə yanacaq ala bilirlər.

Oxşar məhdudiyyətlər Lipetsk vilayətində də tətbiq olunur. Burada bəzi iri yanacaqdoldurma şəbəkələrində satış avtomobil nömrələrinə uyğun günlər üzrə həyata keçirilir və bir avtomobilə satılan benzinin həcmi 30 litrlə məhdudlaşdırılıb.

Krasnodar vilayətində, o cümlədən turizm mərkəzi olan Anapa şəhərində də yanacaq qıtlığı ciddi hiss olunur. Avqustun 17-nə şəhərdə fəaliyyət göstərən 25 yanacaqdoldurma məntəqəsindən 11-i yanacağı yalnız yanacaq kartı olan avtomobillərə və xüsusi xidmət nəqliyyatına satıb. Digər məntəqələrdə isə satış həcminə limitlər tətbiq edilib.

Novorossiysk şəhərində də vəziyyətin gərgin olduğu bildirilir. Avqustun 17-də fəaliyyət göstərən 28 yanacaqdoldurma məntəqəsindən yalnız 5-də AI-92, 6-da isə AI-95 markalı benzin olub. Dizel yanacağı isə 27 məntəqədə satılıb.

Yanacaq çatışmazlığının səbəbləri

Rusiya rəsmiləri problemin bir neçə amillə bağlı olduğunu bildirirlər. Bunlar arasında bəzi neft emalı zavodlarının fəaliyyətinin dayanması, Ukraynanın enerji infrastrukturuna PUA hücumları, yay aylarında yanacağa tələbin artması və regionlara daşınmada yaranan logistika problemləri göstərilir.

Rusiya Baş nazirinin müavini Aleksandr Novak yanacaq təminatındakı problemlərin aradan qaldırılması üçün sektor nümayəndələri ilə mütəmadi görüşlər keçirir. Avqustun 14-də keçirilən iclasda Orenburq, Lipetsk, Tver və Oryol vilayətləri, eləcə də bir sıra digər regionlarda yanacaq təminatı müzakirə olunub.

Moskva da problemdən kənarda qalmayıb. Paytaxtdakı bəzi yanacaqdoldurma məntəqələrində yanacaq qıtlığı, digərlərində isə uzun növbələr müşahidə olunur.

Hökumət nəzarəti gücləndirib

Yanacaq çatışmazlığı Rusiyanın Federal Antiinhisar Xidmətinin (FAS) da nəzarəti gücləndirməsinə səbəb olub. Qurumun məlumatına görə, ilin əvvəlindən avqustun 17-dək neft şirkətləri və müstəqil yanacaq bazarı iştirakçıları ilə bağlı 41 araşdırma başlanıb və 68 xəbərdarlıq verilib.

Araşdırmaların 30-u yalnız yay aylarında aparılıb. FAS xüsusilə yanacaqdoldurma məntəqələrində qiymətlərin formalaşması və rəqabət qaydalarının mümkün pozulmasını araşdırır.

Rusiyada ilk ciddi yanacaq qıtlığı mayın sonunda başlamışdı. Sonrakı həftələrdə bir sıra regionlarda avtomobillərə satılan yanacağın həcminə limitlər qoyulmuş, bidonla yanacaq alınmasına qadağalar tətbiq edilmişdi. İyulun ikinci yarısında vəziyyətin nisbətən yaxşılaşdığı və bəzi məhdudiyyətlərin yumşaldıldığı açıqlanmışdı.

Lakin avqustun ortalarından etibarən benzinin təchizatının yenidən azalması və daha əvvəl götürülmüş məhdudiyyətlərin bəzi regionlarda bərpa olunması Rusiyada yanacaq böhranının ikinci dalğasının başladığını göstərir.