Buğdanın qiyməti Rusiyaya pilotsuz təyyarələrin hücumundan sonra 4 ayın ən yüksək səviyyəsinə qalxıbb
Rusiyanın Qara dəniz sahilində mühüm ixrac mərkəzi olan Novorossiysk limanına irimiqyaslı pilotsuz təyyarə hücumundan sonra buğdanın qiyməti dörd ayın ən yüksək səviyyəsinə qalxıb.
Yerli rəsmilərin sözlərinə görə, hücum nəticəsində limandakı yanacaq terminalında və sahil obyektlərində yanacaq çəni zədələnib. Bununla belə, taxıl əməliyyatlarına təsir edib-etmədiyi hələ aydın deyil.
Bloomberg-in məlumatına görə, Çikaqo Birjasında satılan buğda fyuçers müqavilələri iyulun əvvəlindən bəri ən yüksək səviyyəyə qalxıb.
Cornucopia Agri Analytics-in strateqi Tobin Gorey, Novorossiysk-in "Rusiyanın taxıl ixracı üçün əsas liman" olduğunu vurğulayıb: "Əgər axın hər hansı bir əhəmiyyətli dövr üçün kəsilərsə, treyderlər bu taxılı başqa yerdə əvəz etməli olacaqlar və bu, asan deyil".
Bu arada, bazarlar bu gün ABŞ Kənd Təsərrüfatı Departamentinin (USDA) hökumətin bağlanması səbəbindən təxirə salınan Dünya Kənd Təsərrüfatı Təchizat və Tələb Hesabatının açıqlanmasını gözləyir.
Taxıl və soya fyuçersləri bağlanma başa çatdıqdan sonra kənd təsərrüfatı məlumatlarının açıqlanması ərəfəsində həftə ərzində yüksəldi. Çikaqoda qarğıdalı fyuçersləri 6 faizdən çox, soya fyuçersləri isə təxminən 3 faiz artıb.
