REBRENDİNQ NƏDİR?

21 aprel 2025

Rebrendinq — bir şirkətin, məhsulun və ya xidmətin adını, loqosunu, vizual üslubunu, mesajlarını və ya ümumi imicini dəyişməsi prosesidir. Məqsəd – ictimai rəyə təsir etmək, bazardakı mövqeyi gücləndirmək, hədəf auditoriyanı genişləndirmək və ya keçmişlə bağlı mənfi assosiasiyalardan uzaqlaşmaqdır.

Rebrendinqin əsas səbəbləri:

İmicin yenilənməsi – Şirkət artıq köhnəlmiş və ya çağın tələblərinə cavab verməyən görünüşünü modernləşdirmək istəyir.
Yeni auditoriyaya xitab – Daha gənc nəsil, başqa ölkə və ya fərqli bazar üçün uyğunlaşma məqsədilə.
Şirkətin istiqamət dəyişikliyi – Məsələn, yalnız geyim satan brend artıq texnologiya sahəsinə keçibsə, ad və dizayn da dəyişə bilər.
Birləşmə və ya satınalma – İki şirkət birləşəndə onların adları və vizualları bir brend halına gətirilə bilər.
Mənfi reputasiyadan qurtulmaq – Keçmişdə baş verən qalmaqallar və ya neqativ hadisələr səbəbilə “təmiz səhifə” açmaq istəyi.

Rebrendinq nəyə təsir edə bilər?

Şirkət və ya məhsulun adı
Loqo və rəng palitrası
Slogan və marketinq mesajları
Veb sayt, mobil tətbiq və sosial media görünüşü
Daxili şirkət mədəniyyəti və dəyərləri

Uğurlu rebrendinq nümunəsi:

1 Facebook → Meta (2021)
Mark Zuckerberg şirkətin metaverse yönümlü olacağını açıqladı və buna uyğun olaraq ad və imic tam dəyişdirildi.

2. Apple

Əvvəl: 1990-cı illərdə Apple maliyyə böhranı yaşayırdı.
Dəyişiklik: Steve Jobs geri döndü, sadə və müasir dizayna keçid edildi, “Think Different” kampaniyası başladı.
Nəticə: Apple texnologiya nəhəngi oldu, brend dəyəri milyardlarla dollar artdı.

3. Burberry

Əvvəl: Brend “köhnə moda” və “sıradan kütlə” ilə assosiasiya olunurdu.
Dəyişiklik: Gənc dizaynerlər işə cəlb edildi, loqo və məhsullar yeniləndi.
Nəticə: Burberry dəb dünyasında yenidən elit brend statusu qazandı.

4. Instagram

Əvvəl: Köhnə, fotoaparat formasında loqo.
Dəyişiklik: Daha minimalist və rəngli loqo ilə mobil trendlərə uyğunlaşdı (2016).
Nəticə: Əvvəl tənqid edilsə də, çox tez qəbullanıldı və istifadəçi artımı davam etdi.

4. Dunkin’ Donuts → Dunkin’

Dəyişiklik: Brenddən “Donuts” sözü çıxarıldı, çünki artıq yalnız qənnadı deyil, içkilər (xüsusilə qəhvə) də əsas məhsul idi.
Nəticə: Müasir, daha geniş məhsul çeşidinə uyğun bir imic yaradıldı və satışlar artdı.

Uğursuz Rebrendinq Nümunələri

1. Tropicana (2009)

Əvvəl: Tropicana-nın portağal və borulu loqosu tanınmış simvol idi.
Dəyişiklik: Yeni qablaşdırma və loqo tanınmaz hala gəldi.
Nəticə: Müştərilər məhsulu tanımadı, satışlar 20% azaldı, brend 50 milyon dollar ziyana düşdü. Köhnə dizayna geri qayıtdılar.

2. Gap (2010)

Əvvəl: Klassik GAP loqosu mavi kvadratla tanınırdı.
Dəyişiklik: Müasir görünüş yaratmaq istədilər, amma yeni loqo bəyənilmədi.
Nəticə: Cəmi 6 gün sonra ictimai təzyiqlə köhnə loqo geri qaytarıldı.

3. Pepsi (loqo dəyişiklikləri)

Əvvəl: Ənənəvi loqo tanınırdı.
Dəyişiklik: Yeni loqo üçün 1 milyard dollara yaxın pul xərcləndi.
Nəticə: Vizual dəyişiklik effekt yaratmadı, satışlara əhəmiyyətli təsir göstərmədi. Tənqid çox oldu.

4. Yahoo

Əvvəl: Güclü texnoloji brend idi.
Dəyişiklik: Loqosu və strategiyası bir neçə dəfə dəyişdirildi, ardıcıl rebrendinq mesajı olmadı.
Nəticə: Brend zərər gördü, bazardakı payı azaldı, Google və Facebook kimi rəqiblər önə keçdi.