Neftin "Liviya həyacanı": qiymətlər artır
Neft qiymətləri bir gün əvvəl davamlı yüksəlişdən sonra bugün də səhər yüksəlir. Londonun ICE Futures birjasında saat 9:20-də Brent markalı neftin avqust fyuçerslərinin dəyəri bir barel üçün 116,6 dollar təşkil edir ki, bu da əvvəlki sessiyanın bağlanış qiymətindən 1,51 dollar (1,31%) çoxdur.
Nyu-York əmtəə birjasının (NYMEX) elektron hərraclarında avqust ayı üçün WTI neftinin fyuçerslərinin qiyməti bu vaxta kimi bir barel üçün 110,82 dollar təşkil edir ki, bu da əvvəlki sessiyanın yekun dəyərindən 1,25 dollar (1,14%) çoxdur.
Bazar hələ də enerji resurslarının tədarükünün azaldılması perspektivlərindən narahatdır. Bazar ertəsi media xəbər verib ki, Liviyadan neft tədarükü ölkədə pisləşən siyasi böhran səbəbindən azalmağa davam edə bilər və hökumət əleyhinə etirazlar səbəbindən Ekvadorda neft hasilatı təhlükə altına düşə bilər.
Bu arada, əsas neft hasil edən ölkələr olan BƏƏ və Səudiyyə Ərəbistanından tədarükün artırılması perspektivləri məhdud olaraq qalır. Fransa prezidenti Emmanuel Makron Almaniyada keçirilən G7 sammiti zamanı ABŞ prezidenti Co Baydenə bildirib ki, BƏƏ və Səudiyyə Ərəbistanında neft hasilatının hazırkı səviyyəsi demək olar ki, maksimum həddə çatıb. Makron BƏƏ prezidenti Məhəmməd bin Zayed əl-Nəhyanla söhbətinə toxunub.
SPI Asset Management-in analitiki Stefan İnnes, "Struktur defisit davam edir. Neftin qiymətlərinin əhəmiyyətli və daimi enişə keçməsi üçün bazara daha çox barelin daxil olması lazımdır", - deyib.
Bazar indi Cümə axşamı günü keçiriləcək OPEC+ görüşünə diqqət yetirəcək. Gözlənildiyi kimi, alyans ölkələri hasilatın artırılması ilə bağlı əvvəlki plana əməl etməyə davam edəcək.
