Banklar niyə böyük likvid vəsaitlər saxlamağa məcburdurlar və ya uzunmüddətli kreditlər vermirlər?

Azərbaycan Mərkəzi Bankının məlumatına görə, bankların borclarının (öhdəliklərinin) 80.4%-ini fiziki və hüquqi şəxslərin depozit portfeli təşkil edir. 2021-ci ildə sektorun depozit portfeli 30.0% (6.2 mlrd. manat) artaraq 26.9 mlrd. manat olub.

ENA.az xəbər verir ki, nəzərə çarpacaq rəqəm odur ki, depozit portfelinin 27.4%-ni müddətli, 72.6%-ni isə tələbli depozitlər təşkil edir. Sektorun depozit portfelinin əsasən tələbli depozitlər hesabına formalaşması banklarda iri həcmdə likvidlik buferinin saxlanmasını zəruri etməklə uzunmüddətli maliyyələşmə imkanlarını məhdudlaşdırır.

Bankların depozit portfelinin 66.5%-ini hüquqi şəxslərin depozitləri təşkil edir. Bütövlükdə, hüquqi şəxslərin depozitlərinin öhdəliklərdə payı 53.5%-dir.

2021-ci ildə hüquqi şəxslərin depozitləri 41.2% (5.22 mlrd. manat) artaraq 17.9 mlrd. manat təşkil edib. Bu artımın 99.7%-i də məhz tələbli depozitlərin artımı hesabınadır (5.21 mlrd. manat artım). Hüquqi şəxslərin depozitlərinin 88.5%-i (15.9 mlrd. manat) tələbli depozitlər hesabına formalaşıb.

Qeyd edək ki, 2021-ci ilin sonu üzrə bank sektorunun aktivlərinin 40.3%-ni xalis kredit portfeli, 36.1%-ini isə likvid aktivlər təşkil edir.