Britaniya Ukraynaya bu raket sistemlərini GÖNDƏRİR
Böyük Britaniya Ukraynaya "Stormer" adlı özüyeriyən raket sistemləri göndərəcək.
ENA.az xəbər verir ki, bu barədə “The Sun” qəzeti Britaniya Müdafiə Nazirliyindəki mənbələrə istinadən məlumat yayıb.
Bildirilir ki, iki həftə əvvəl Britaniya ordusu Solsberidə keçirilən sərgidə ukraynalı həmkarlarına "Stormer" sistemlərinin imkanlarını nümayiş etdirib.
Nəşr yazır ki, 13 tonluq yüksək texnologiyalı raket buraxılış qurğuları bir neçə gün ərzində Ukraynaya göndərilə bilər. Mütəxəssislər bu silahı Qərb dövləti tərəfindən indiyə qədər göndərilmiş "ən yaxşı silah" adlandırırlar.
"Stormer" raket buraxılış sistemləri "Starstreak" adlı raketlərlə təchiz edilib. Bu raketlər alçaqdan uçan helikopterləri və döyüş təyyarələrini məhv edə bilir. Sistem Ukraynanın rütubətli torpaqlarında da hərəkət edə biləcək.
Xatırladaq ki, hələ mart ayında Ukrayna Britaniyanın "Starstreak" raketlərini alıb. Bundan sonra Baş nazir Boris Conson Kiyevə "daha öldürücü" silahlar təhvil verəcəyini bildirib.
