Təmassız ödənişin limiti 2 dəfə artırıldı
Kart vasitəsilə əməliyyatların aparılması qaydalarına dəyişiklik edilib.
Bu, Mərkəzi Bankın İdarə Heyətinin qərarı ilə təsdiq edilmiş “Ödəniş kartlarının emissiyası və istifadə Qaydaları”nda dəyişiklik edilməsi barədə qərarında əksini tapıb.
Dəyişikliyə əsasən, emitent və (və ya) ekvayer tərəfindən daha aşağı limit müəyyən edilmədikdə bankomat, POS-terminal və digər ödəniş terminalları vasitəsilə 100 (yüz) manat və ondan yuxarı məbləğdə həyata keçirilən nağdsız əməliyyatlar PİN-kodun daxil edilməsi və ya emitent tərəfindən kart istifadəçisinin müəyyən edilməsi üçün tətbiq edilən digər üsulların istifadə edilməsi ilə aparılacaq.
İndiyə qədər bu məbləğ 50 manat idi.
Qeyd edək ki, bu dəyişiklik Prezident İlham Əliyevin sərəncamı ilə təsdiq edilmiş “2018–2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı”na uyğun olaraq innovativ ödəniş həllərini özündə ehtiva edən rəqəmsal ekosistemin yaradılması istiqamətində görülən işlərin davamı olaraq ödəniş kartları ilə əməliyyatlarda təmassız ödənişlərin daha da genişləndirilməsi məqsədilə edilib.
Qərar 13 avqust 20120-ci il tarixindən qüvvəyə minib.
Təmassız ödəniş – gündəlik olaraq hər bir mal alışı və ya xidmət üçün ödəniş etdikdə vaxta qənaət etmək deməkdir. Kartı POS terminala yaxınlaşdırmaq kifayət edir ki, ödəniş PİN kod yığılmadan birbaşa həyata keçsin. İndiyədək ödəniş məbləği 50 manatdan çox olduğu halda əməliyyatı həyata keçirmək üçün kartı POS terminala yaxınlaşdırdıqdan sonra PİN kodu yığmaq tələb olunurdu. İndi 100 manatdan yuxarı əməliyyatlar üçün PİN kod tələb olunacaq.
