“Azərgold” və “Anglo Asian Mining” yerli zərgərlərə qızıl sata bilər

Qarşıdakı illərdə “Anglo Asian Mining” şirkəti və “Azərgold” QSC-nin yerli zərgərlərə qızıl satacağı gözlənilir.

Bu barədə Azərbaycan Zərgərlər Assosiasiyasının sədri Toğrul Abbasquliyev bildirib.

“Anglo Asian Mining” şirkəti və “Azərgold” QSC ilə əməkdaşlıq etmək məsələlərini müzakirə etmişik. İstəyirik bu şirkətləri yerli sənayeyə də cəlb edək. Yəqin ki, irəlidəki illərdə belə bir potensialın reallaşdırılması mümkün olacaq”, – deyə T.Abbasquliyev qeyd edib.

Xatırladaq ki, “Anglo Asian Mining”və “Azərgold” Azərbaycanda qiymətli və əlvan metal filizi yataqlarının öyrənilməsi, tədqiqi, kəşfiyyatı, idarə olunması, qiymətli və nəcib metalların hasilatı, emalı və satışı, bu sahədə yeni texnologiyaların tətbiqi, maddi-texniki bazanın müasirləşdirilməsi və ondan səmərəli istifadə, habelə bu sahənin inkişafı ilə bağlı digər işləri yerinə yetirir. Hazırda bu müəssisələr daxili bazara deyil, yalnız xarici bazarlara qızıl və digər qiymətləri metalları ixrac edirlər.

Ümumilikdə isə bu ilin ilk altı ayı ərzində ölkədə 3 862 kiloqram qızıl və gümüş hasılatı olub ki, bu da keçən ilin müvafiq dövrü ilə müqayisədə 12,3% artım deməkdir.

2020-ci ilin yanvar-iyun ayları ərzində Azərbaycandan 85,7 milyon ABŞ dolları məbləğində qızıl (sikkə kəsilməsində istifadə olunmayan, digər emal olunmamış formalarda) ixrac edilib.