Azərbaycanın ən böyük neft yataqlarında hasilat azalıb
Bu ilin I rübündə Xəzərin Azərbaycan sektorunda yerləşən “Azəri-Çıraq-Günəşli” (AÇG) neft-qaz yataqları blokunda 6,4 mln. tondan artıq neft hasil edilib, bu da 2019-cu ilin müvafiq dövrü ilə müqayisədə 8,6% azdır.
"ENA"nın BP-nin (layihənin operatoru) Azərbaycanda apardığı əməliyyatlar üzrə 2019-cu ilin yekunlarına görə dərc etdiyi hesabata istinadən verdiyi məlumata əsasən, ilin sonunda AÇG-də ümumilikdə 129 neft hasilat quyusu və 42 su injektor quyusu və 7 qaz injektor quyusu istismarda olub.
Hesabata görə, ötən il ərzində AÇG üzrə fəaliyyətlərə təqribən 150 mln. ABŞ dollar əməliyyat məsrəfləri və 522 mln. dollar əsaslı məsrəflər xərclənmişdir. İl ərzində AÇG-də 4 neft hasilat quyusu qazılıb.
Xatırladaq ki, ötən il AÇG blokunda iki platformanın fəaliyyəti planlaşdırılmış profilaktik işlərin aparılması məqsədilə dayandırılıb.
Qeyd edək ki, AÇG-də pay bölgüsü bu nisbətdədir: BP - 30,37% (operator), AzACG (SOCAR) – 25,00%, MOL – 9,57%, "Inpex" – 9,31%, "Equinor" (keçmiş "Statoil") – 7,27%, "ExxonMobil" – 6,79%, TPAO – 5,73%, "Itochu" – 3,65% və "ONGC Videsh Ltd." (OVL) – 2,31%. Tərəflər arasında razılaşma 30 il müddətinə etibarlı idi (2024-cü ildə başa çatmalı idi). Buna baxmayaraq, 2017-ci il sentyabr ayının 14-də Azərbaycan hökuməti və SOCAR, beynəlxalq tərəfdaşlar şirkətlərlə birlikdə AÇG-nin birgə işlənməsi və Hasilatın Pay Bölgüsü haqqında dəyişdirilmiş və yenidən işlənmiş sazişi imzaladılar. AÇG-nin 2050-ci ilə qədər inkişafını əhatə edən yeni müqavilə əsrin ortalarınadək blokun inkişaf potensialını əhəmiyyətli dərəcədə artırmağa imkan yaradacaq.
