"Yeni qaydalarla 506 kənd təsərrüfatı texnikası sata bilmişik"
1 ay ərzində dövlət dəstəyi ilə 506 kənd təsərrüfatı texnikası satılıb.
Mirzə Əliyev: “Texnika və damazlıq heyvan satışı bazarının liberallaşdırılması iqtisadi təhlükəsizliyin təmini istiqamətində əhəmiyyətli addımlardandır”
“AKİA vəsaitindən istifadə ilə kənd təsərrüfatı texnikasının aktiv satışına mart ayından başlanılıb. Aprelin 15-dək yeni qaydalarla 506 kənd təsərrüfatı texnikası sata bilmişik. Mart ayındakı istirahət günlərinin sayı bizə imkan verir deyək ki, bu nəticəyə 1 ay ərzində nail olmuşuq” – Aqrar Kredit və İnkişaf Agentliyinin sədri Mirzə Əliyev deyib.
Mirzə Əliyev qeyd edib ki, satılmış texnikanın 411-i Aqrolizinq ASC-yə, 95 ədədi isə digər təchizatçılara məxsus olub. Ümumilikdə 32 milyon manatlıq texnika satışına görə 12.8 milyon manat dövlət vəsaiti ayrılaraq, subsidiya kimi fermerlərin əvəzindən təchizatçılara ödənilib.
Aqrar Kredit və İnkişaf Agentliyi fermerlərə 8 milyon manat kredit verib.
Qeyd edək ki, Azərbaycan Respublikası Prezidentinin 19 dekabr 2018-ci il Fərmanı ilə kənd təsərrüfatı texnikası və damazlıq heyvan satışı bazarı liberallaşdırılıb. Fərmanadək yalnız səhmləri dövlətə məxsus Aqrolizinq Səhmdar Cəmiyyətinin bazalarında olan texnika və damazlıq heyvanın satışına dövlət güzəşti tətbiq edilirdisə, yeni qaydalara müvafiq olaraq , istənilən təchizatçıdan kənd təsərrüfatı texnikası və damazlıq heyvan alan şəxs dövlət güzəştindən faydalana bilir.
Qaydalara uyğun olaraq, kənd təsərrüfatı texnikasının dəyərinin 40%-i, damazlıq heyvanın isə dəyərinin 60%-i məbləğində vəsaiti Aqrar Kredit və İnkişaf Agentliyi fermerin əvəzindən təchizatçıya ödəyir. Bundan başqa, texnika və heyvanın güzəştli kreditlə satışı zamanı kredit faizlərini də AKİA vətəndaşın əvəzindən ödəyir.
