ABŞ və İran yekun sülh sazişi üçün 60 günlük yol xəritəsini razılaşdırıb
Qətərin Xarici İşlər Nazirliyinin “X” sosial şəbəkəsində dərc etdiyi Doha və İslamabaddan olan vasitəçilərin birgə bəyanatına görə, ABŞ və İran İsveçrədə keçirilən danışıqlarda 60 gün ərzində yekun sülh sazişinin əldə olunması üçün yol xəritəsi barədə razılığa gəliblər.
Bəyanatda deyilir: “Yüksək səviyyəli komitə 60 gün ərzində yekun razılaşmanın əldə olunmasına dair yol xəritəsini təsdiqləyib. Bu, növbəti texniki danışıqların dərhal başlanması üçün zəmin yaradır”.
Nümayəndə heyətlərinin görüşlərinin ilk raundu iyunun 22-də, bazar ertəsi başa çatıb. Eyni zamanda vurğulanıb ki, texniki danışıqlar həftənin sonunadək Qətərə məxsus olan İsveçrənin Bürgenştok dağ kurortunda davam edəcək.
Sənədə əsasən, tərəflər Livanda hərbi əməliyyatların dayandırılması mexanizmi barədə də razılığa gəliblər və Hörmüz boğazından kommersiya gəmilərinin təhlükəsiz keçidini təmin etmək üçün birbaşa rabitə xətti açıblar.
Bundan əlavə, Reuters-in məlumatına görə, ABŞ-nin vitse-prezidenti Cey Di Vens ötən həftə əldə olunmuş qarşılıqlı anlaşma memorandumuna uyğun olaraq İran rəsmiləri ilə atəşkəsin ən azı daha 60 gün uzadılması məsələsini müzakirə etməyə başlayıb.
Daha əvvəl İran Xarici İşlər Nazirliyinin sözçüsü İsmayıl Bəqayi bildirmişdi ki, Tehran və Vaşinqton Hörmüz boğazından gəmilərin təhlükəsiz keçidini təmin etmək üçün fövqəladə mexanizm yaratmaq barədə razılığa gəliblər. İranın xarici işlər naziri Abbas Əraqçi isə neft ixracı və İran aktivlərinin dondurulmasının aradan qaldırılması da daxil olmaqla bir sıra məsələlər üzrə razılıq əldə olunduğunu açıqlayıb.
Danışıqlardan əvvəl Tehran Hörmüz boğazını yenidən bağlamaq niyyətini bəyan etmiş, ABŞ prezidenti Donald Tramp isə İrana qarşı hücumların bərpa oluna biləcəyi ilə hədələmişdi. Bu səbəbdən İran nümayəndə heyəti İsveçrədəki danışıqlar məkanını tərk etmişdi. “Al Mayadeen” telekanalının məlumatına görə, İran Trampdan üzr istəməyi tələb edib. ABŞ prezidenti iranlı danışıqlarçılara “Hörmüz boğazını bağlasanız, ölkəniz olmayacaq” demişdi.
ABŞ və İran iyunun 18-nə keçən gecə memorandum imzalayıblar. Bu sənəd iki ölkə arasında silahlı münaqişənin başa çatdırılması istiqamətində ilk addım hesab olunur və daha genişmiqyaslı saziş üzrə danışıqlara yol açmalıdır.
