Rusiyada aviabiletlərlə bağlı yeni qayda: reysə gəlməyən sərnişinin bileti ləğv olunmayacaq

Sentyabrın 1-dən Rusiyanın Nəqliyyat Nazirliyinin bir neçə seqment üzrə aviabiletlərin sərnişinin gəlməməsi halında ləğvini qadağan edən əmri qüvvəyə minir. Sənəd artıq rəsmi şəkildə açıqlanıb.

Sərəncamın mətninə əsasən, reysi buraxıldığı halda, sərnişin qarşıdakı 2 saat ərzində növbəti reyslərdə daşımasını davam etdirmək niyyəti barədə aviaşirkətə məlumat verə bilər.

Qeyd edək ki, sənəd senatorların Nəqliyyat Nazirliyinə müraciətindən sonra ortaya çıxıb. Lakin bu təklif aviasiya sənayesində həvəslə qarşılanmayıb. Bir sıra ekspertlər hesab edir ki, belə yanaşma daşıyıcıların müəyyən edilmiş qiymət siyasətini pozur və onları gəlirlərinin bir hissəsindən məhrum edir. Yeni qaydaların beynəlxalq IATA standartlarına zidd olması ilə yanaşı, onların tətbiqi aviabiletlərin qiymətlərində ümumi artıma səbəb ola bilər.