Nvidia və General Motors süni intellektə əsaslanan yeni nəsil avtomobil istehsal edəcəklər
Şirkətlərdən verilən ortaq açıqlamada General Motors və Nvidia-nın fərdiləşdirilmiş süni intellekt sistemləri yaratmaq üçün birlikdə çalışacağı bildirilib.
Açıqlamada Nvidia-nın sürətləndirilmiş hesablama platformalarının, o cümlədən Nvidia Cosmos və Nvidia Omniverse-dən General Motors-un istehsal planlamasını və robot texnologiyalarını optimallaşdırmaq üçün süni intellektdən istifadə ediləcəyi qeyd edilib.
Həmçinin bildirilib ki, General Motors sürücüyə yardım sistemləri və kabinədə təhlükəsiz sürücülük təcrübələri üçün avtomobildaxili avadanlıqlarda Nvidia Drive AGX-dən istifadə edəcək.
Nvidia telekommunikasiya sənayesi liderləri ilə 6G üçün süni intellektə əsaslanan simsiz şəbəkələri inkişaf etdirəcək
Digər tərəfdən, Nvidia tərəfindən edilən başqa bir açıqlamada şirkətin 6G üçün süni intellektə əsaslanan simsiz şəbəkə aparat, proqram təminatı və arxitekturasına dair araşdırma və inkişaf işləri aparacağı ifadə edilib.
Açıqlamada yüz milyardlarla telefonu, sensoru, kameranı, robotu və avtonom nəqliyyat vasitəsini qüsursuz bir şəkildə birləşdirmək üçün yeni nəsil simsiz şəbəkələrin süni intellektlə inteqrasiyasına ehtiyac duyulacağı, süni intellektə əsaslanan simsiz şəbəkələrin milyardlarla istifadəçiyə qabaqcıl xidmətlər göstərəcəyi və məlumatların ötürülmə sürətində müəyyən diapazonda effektivlik standartlarını təyin edəcəyi bildirilib.
Həmçinin qeyd olunub ki, bu şəbəkələr telekommunikasiya şirkətləri üçün yeni gəlir mənbələri yaratmaqla yanaşı, yüksək performans və resurslardan istifadəni təmin edəcək.
