Tramp: Putin mənimlə görüşmək istəyir. Biz bu görüşü təşkil edirik
ABŞ-ın yeni seçilmiş prezidenti Tramp Floridadakı Mar-a-Laqo malikanəsində respublikaçı qubernatorlarla görüşdükdən sonra mətbuata qısa açıqlama verib.
Tramp açıqlamasında Rusiya-Ukrayna müharibəsinə toxunub və Rusiya prezidenti Putinin onunla görüşmək istədiyini bildirib.
"O (Putin) mənimlə görüşmək istəyir; bu görüşü biz təşkil edirik. Prezident Putin görüşmək istəyir, bunu açıq şəkildə bəyan edib. Biz bu müharibəni bitirməliyik, bu, çox qanlı müharibədir". Tramp deyib, lakin sözügedən görüşün nə vaxt keçiriləcəyi ilə bağlı təfərrüata varmayıb.
Tramp daha əvvəl prezidentliyə başladıqdan sonra Rusiya-Ukrayna müharibəsini mümkün qədər tez bitirmək istədiyini və bu məqsədlə Putinlə görüşməyə hazır olduğunu bildirmişdi.
