MALİYYƏ

Azərbaycan dövlət avrobondlarını tam geri aldı - RƏSMİ AÇIQLAMA

Azərbaycan dövləti 900 milyon dollar dəyərində dövlət təminatlı avtobondları geri alıb. 2024-cü ilin ilk rübündə reallaşan bu əməliyyat öz növbəsində maliyyə əməliyyatları balansında defisit yaradıb. 

ENA.az xəbər verir ki, Azərbaycan Mərkəzi Bankının Statistika Departamentinin Direktoru Samir  Nəsirov bugün ölkənin tədiyyə balansının əsas parametrlərini açılayıb. Onun sözlərinə görə, məhz bu amil nəticəsində xarici maliyyə öhdəliklərinin ödənilməsi ilə bağlı kapital-maliyyə hərəkəti balansında 1,6 milyard dollarlıq kəsir yaranıb.  Ehtiyat aktivləri isə 116 milyon dollar artıb. 

Qeyd edək ki, Azərbaycan Respublikası tərəfindən 2014-cü ilin mart ayında ölkə tarixində ilk dəfə olaraq 1 milyard 250 milyon ABŞ dolları məbləğində xarici valyuta nominallı dövlət qiymətli kağızları (avrobondlar) 4,75% dərəcəsi ilə 10 il müddətinə beynəlxalq maliyyə bazarlarında yerləşdirilmişdi.

Borc strategiyası çərçivəsində qarşıya qoyulan hədəflərə, xarici valyutada ifadə olunmuş borcun ümumi borc portfelində xüsusi çəkisinin azaldılmasını və müvafiq olaraq milli valyutada ifadə olunmuş borcun artırılması məqsədilə ötən il ərzində daxili maliyyə bazarlarında emissiya olunan dövlət istiqrazlarından əldə edilmiş vəsait hesabına Azərbaycan dövlətinin 2024-cü ildə geri qaytarılması nəzərdə tutulan 1 milyard 250 milyon ABŞ dolları məbləğində xarici valyuta nominallı dövlət istiqrazlarının (avrobondların) 350 milyon ABŞ dolları məbləğində hissəsini 2023-cü ildə vaxtından əvvəl geri alıb. Sözügedən avrobondun 900 milyon ABŞ dolları hissəsi isə 2024-cü ildə xarici investorlara ödənilib. Beləliklə, ölkəmizin avrobondlarla bağlı xarici borcu tam bağlanmış oldu.  

 

Ən vacib xəbərləri Telegram kanalımızdan OXUYUN! (https://t.me/enaxeber)