"Trendyol" Azərbaycan ilə bağlı hədəflərini açıqladı
"Azərbaycanın dinamikasına, gələcəyinə və potensialına inandığımız üçün bu bazara addım atmışıq. Azərbaycanda elektron ticarət bazarının böyüməsi ilə birlikdə biz də rəqəmsal ekosistemə öz dəstəyimizi göstərəcəyik".
ENA.az xəbər verir ki, bunu "Trendyol"un Bakı ofisinin açılışından sonra keçirilmiş mətbuat konfransında "Trendyol"un Baş İcraçı direktoru Erdem İnan bildirib.
O çıxışında, "Bu yola "PAŞA Holdinq" ilə çıxarkən, "PAŞA Holdinq"in Azərbaycanda fərqli sahələrdəki böyük təcrübəsini və "Trendyol"un texnologiyasını, logistikasını və satış təcrübəsini birləşdirdik və bu gün müsbət nəticələrini görməkdəyik. "Trendyol" daxil olduğu bazarlara yalnız məhsullar satmaq üçün baxmır, həmin bazarlarda rəqəmsal ekosistemin bir hissəsi olmağı, aparıcı bir qüvvəsinə çevrilməyi, irəli aparmağı hədfləyir", - deyib.
Erdem İnan qeyd edib ki, hazırda Azərbaycanın elektron ticarət bazarının həcmi illik 2 milyard dollardır:
"Azərbaycanın elektron ticarət bazarının həcminin 2030-cu ilədək illik orta hesabla 13% artacağını gözləyirik. Azərbaycan hələ e-ticarət yolunun başlanğıcındadır. "PAŞA Holdinq" ilə birlikdə çalışaraq bir çox həlli, məhsulu, xaricdə qazandığımız təcrübələri Azərbaycan bazarına gətirəcəyik. 2028-ci ildə Azərbaycanda 1 milyard dollarlıq ticarət həcmi yaratmağı, 3 milyon müştəriyə illik 60 milyon ədəd məhsulu çatdırmağı hədəfləyir. Bu hədəflərə nail olmaq üçün rəqəmsal ekosistemin bütün iştirakçıları - müştərilər, satıcılar, media agentlikləri, influserlər, logistika tərəfdaşlarımız, finteklər, banklar ilə birlikdə çalışacağıq".
Xəbər verdiyimiz kimi, bu gün Bakıda Türkiyənin onlayn- alış-veriş platforması "Trendyol"un nümayəndəliyi açılıb. E-ticarət nəhənginin Bakı nümayəndəliyi "Crescent" biznes mərkəzində yerləşir. Ofisin açılmasının Azərbaycan və Türkiyə arasında ticarət dövriyyəsinin artmasına, müştəri məmnuniyyətinin yüksəlməsinə, yerli logistika şirkətlərinin işinə müsbət töhfəsini verəcəyi gözlənilir.
Qeyd edək ki, "Trendyol"un Azərbaycanda tərəfdaşı "PAŞA Holdinq"dir.
