Sığorta mexanizmi düzgün işləmirsə...Selin vurduğu ziyan hesablanır
Son günlər havaların kəskin pisləşməsi, xüsusən dağətəyi rayonlardakı sel və daşqınlar katastrofik risklər yaratdı. Evləri sel aparıb, əhaliyə maddi ziyan dəyib. Təbii ki, bu halda sığorta şirkətləri ziyanın ödənilməsində mühüm rol oynaya bilər, amma təəssüf ki, Azərbaycanda sığorta bazarı, xüsusən də daşınmaz əmlak sığortası yaxşı vəziyyətdə deyil.
İcbari Sığorta Bürosunun İcraçı direktoru Rəşad Əhmədovun sözlərinə görə, hər hansı katastrofik risk yarandığı təqdirdə Azərbaycan dövlətinin büdcəsi ciddi şəkildə yüklənmiş olacaq. Hazırda qeydiyyatda olan evlərin sayını sığorta olunmuş evlərin sayı ilə maqyisə etdikdə məlum olur ki, hər on əmlakdan cəmi biri sığortalanıb. Bu isə onu göstərir ki, Azərbaycanda təhlükəsizlik səviyyəsi istənilən səviyyədə deyil.
Qeyd edək ki, daşınmaz əmlakın sığortalanması icbaridir və sığorta olunmadıqda cərimə nəzərdə tutulur. Amma cərimə mexanizmi aydın deyil, ona görə də faktiki olaraq Azərbaycanda işləmir.
Türkiyədə son zəlzələ riskin 103 milyard dollardan yuxarı olduğunu göstərib. Mərmərə zəlzələsi isə 50 milyard dollar ziyan vurub və böyük bir ərazi deyildi. Yəni, zərərlər yerinə görə fərqli ola bilər, Azərbaycanda bu zərərin 10 milyard olacağını demək mümkün deyil.
“Risklər sığorta şirkətlərinə ötürülmürsə və təkrar sığorta mexanizmi düzgün işləmirsə, bu dövlətin üzərində ciddi bir maliyyə yükü əmələ gətirə bilər. Qoruma qalxanının yaradılması lazımdır”.
Xatırladaq ki, mayın 26-dan başlayan və 28-dək davam edəcək Debed və Kür çaylarının daşması nəticəsində Qazax, Göygöl rayonlarında güclü daşqın yaranıb və evlərə, kənd təsərrüfatına ciddi ziyan dəyib. Hazırda ziyanın hesablanması üzrə işlər aparılır.
