Dövlət Fondu mənfəətinin 17% artdığını açıqladı
1 iyul 2023-cü il tarixinə Azərbaycan Respublikasının İpoteka və Kredit Zəmanət Fondunun (İKZF) aktivləri 2 milyard 542 milyon 148,526 min manat təşkil edib. Bu, 2022-ci ilin sonuna olan göstəricidən 5,9% çoxdur.
Fondun yaydığı məlumata görə, 2023-cü ilin birinci yarısının sonuna İKZF-nin kredit portfeli 9,2% artaraq 1 milyard 865 milyon 921,857 min manatdır. Banklarda yerləşdirilən depozitlərin həcmi 3,1% azalaraq 10 milyon 314,201 min manat təşkil edib.
30 iyun 2023-cü il tarixinə Fondun öhdəlikləri 6,2% böyüyərək 1 milyard 480 milyon 804,692 min manat olub. Emissiya edilən qiymətli kağızların həcmi 1 milyard 453 milyon 203,071 min manatdır.
Hesabat dövrünün sonuna İKZF-nin kapitalı 1 milyard 61 milyon 343,834 min manatdır. Nizamnamə kapitalı 893 milyon manat, kapital ehtiyatları isə 10% artımla 112 milyon 915,728 min manat təşkil edib.
Birinci yarımillik ərzində Fondun xalis mənfəəti illik müqayisədə 17,1% artaraq 11 milyon 578,105 min manat, əməliyyat gəlirləri 16 milyon 972,323 min manat təşkil edib.
Qeyd edək ki, İpoteka və Kredit Zəmanət Fondunun bütün səhmləri dövlətə məxsusdur.
