ABŞ-ın Rusiyadakı səfirliyi işçi sayını 75% azaldır
ABŞ-ın Rusiyadakı səfirliyi xarici vətəndaşların işə götürülməsinin qadağan edilməsi ilə əlaqədar konsulluq işçilərinin sayını 75 faiz azaldır.
“ENA” TASS agentliyinə istinadən xəbər verir ki, bu barədə diplomatik nümayəndəliyin saytında dərc olunmuş məlumatda deyilir.
Bu addım Rusiya hökumətinin aprelin 23-də ABŞ səfirliyinə istənilən sayda xarici vətəndaşı işə götürməyi qadağan etmək niyyəti ilə əlaqədar atılır.
Həmçinin, mayın 12-dən etibarən konsulluq xidmətlərinin sayı azalacaq. Xüsusən də diplomatik səfərlər üçün nəzərdə tutulmayan viza sənədlərinə baxılması dayandırılacaq.
Konsulluq xidmətlərinə yalnız ABŞ vətəndaşları üçün təcili xidmətlər və çox məhdud sayda immiqrant vizaları ilə bağlı xidmətlər daxil ediləcək. Qeyri-immiqrant və qeyri-diplomatik vizalar üçün sənədlərin nəzərdən keçirilməsi dayandırılacaq.
Bundan əlavə, Rusiyada viza müddəti bitmiş ABŞ vətəndaşlarına iyunun 15-dək Rusiya Federasiyasını tərk etmələri tövsiyə olunur. Belə ki, pandemiya səbəbiylə əcnəbiləri və vətəndaşlığı olmayan şəxsləri Rusiyadan qovmağı və deportasiya etməyi qadağan edən fərman bu tarixdə qüvvədən düşür.
“Bu tarixdən sonra Rusiyada qalmağı planlaşdırırsınızsa, lazımı sənədləşmə işlərinə başlamaq üçün daxili işlər nazirliyinin yerli ofisini ziyarət edin”, – səfirlik əlavə edib.
