“Rabitəbank”ın törəməsi səhm emissiya edəcək

“Rabitəbank” ASC-nin müşahidə şurasının 9 fevral 2021-ci il tarixli 18 nömrəli qərarına əsasən 1 aprel 2021-ci il saat 17.00-da bankın səhmdarlarının növbəti illik ümumi yığıncağı keçiriləcəkdir.

ENA.az xəbər verir ki, yığıncağın gündəliyinə aşağıdakı məsələlər daxildir:

1. Bankın 2020-ci maliyyə ili üzrə balansının, mənfəət və zərər haqqında hesabatının təsdiqi.

2. Bankın audit komitəsinin hesabatının təsdiqi.

3. “Capital Partners İnvestisiya Şirkəti” QSC-nin səhmlərinin emissiyası.

4. Təşkilati məsələlər.

Xəbər verdiyimiz kimi, "Kapital Partners" Məhdud Məsuliyyətli Cəmiyyəti adını və təşkilati-hüquqi formasını dəyişib. Şirkət “Capital Partners İnvestisiya Şirkəti” adı ilə "Qapalı Səhmdar Cəmiyyət" formasında fəaliyyət göstərəcəkdir.

2007-ci ildə yaradılmış və 80 min manat kapitala malik olan “Capital Partners İnvestisiya Şirkəti”nin qanuni təmsilçisi İbrahim Mikaylovdur. 

Şirkətin 100 faiz təsisçisi "Rabitəbank" ASC-dir.

Qanunvericiliyə görə,  yardımçı investisiya xidmətləri göstərmək üçün minimum 75 min manat, əsas investisiya xidmətləri göstərmək üçün isə minimum 300 min manat nizamnamə kapitalı olmalıdır. “Capital Partners İnvestisiya Şirkəti”nin lisenziya ala bilməsi üçün səhm emissiya edərək nizamnamə kapitalını artırmalıdır.