Rusiyaya pomidor və xiyar satanlara pis xəbər - "5-6 İL ƏRZİNDƏ..."
Rusiya Kənd Təsərrüfatı Nazirliyinin Aqrar Analiz Mərkəzi, Rusiyadakı tərəvəzçilik istiqamətində istixana istehsalının həcminin qarşıdakı 5-6 il ərzində bu gün idxal edilən səviyyəyə çata biləcəyini açıqlayıb.
ENA.az xəbər verir ki, Mərkəzin sədri Dmitriy Aveltsov, "Maksimum pomidor idxalı 550 min ton, xiyar idxalı isə 100 min ton ətrafındadır. İstixanaların inkişaf dinamikaları davam etsə qarşıdakı 5-6 il ərzində bütün idxalı öz istehsalımızla əvəz edə biləcəyik" deyib.
Yalnız 2021 - 2024-cü illər arasında həyata keçiriləcək layihələrin tərəvəz istehsalını ildə 800 min tona qədər artıracağını qeyd edən Aveltsov, istehlakçıların seçimləri səbəbilə idxalın bazardakı payının bir qisiminin qalacağını vurğulayaraq bunları söyləyib:
"Ölkədə istixanaların istehsalı sürətlə artıb. Hazırda 73 yeni təsisin yaradılması, 7 mövcud təsisin modernləşdirilməsi daxil olmaqla təxminən 80 sərmayə layihəsinin olduğunu bilirik. İki il ərində 48 layihənin reallaşdırılması planlaşdırılır. Layihələrin həyata keçirilməsi üzrə 242 milyard rubl sərmayə yatırılacaqdır".
Aqrar Analiz Mərkəzinin məlumatına görə, Rusiya bu il cəmi 438 min ton pomidor idxal edib. Rusiyanın 2019-cu ildə pomidor idxalı 559 min ton təşkil edib və 2018-ci illə müqayisədə 3% azalıb. Əsas tədarükçülər Türkiyə, Azərbaycan və Çindir. İdxalın 60%-i bu ölkələrdən həyata keçirilir.
Rusiyanın xiyar idxalı isə bu ilin 11 ayında 54 min ton, 2019-cu ildə isə təxminən 100 min ton olaraq reallaşıb.Əsas tədarükçülər Çin, İran, Belarusun keçən ilki payı 60% olub.
Yerli pomidorun daxili bazardakı payının 73%, xiyarın isə 89% olduğunu qeyd edən Aveltsov, keçən il Rusiyadakı istixana tərəvəzləri istehsalının 2018-ci illə müqayisədə 13% artaraq təxminən 1.3 milyon ton təşkil etdiyini bildirib.
Aveltsov, bu rəqəmin bu il 1.5 milyon tona çata biləcəyini, sektordakı müsbət meylin davam etməsi vəziyyətində istehsalın 2 milyon ton təşkil edə biləcəyini qeyd edib.Aveltsov, Rusiyanın pomidor ixracının 11 ayda 18.6 min ton olaraq reallaşdığını və əsas alıcıların MDB ölkələri başda olmaqla Birləşmiş Ərəb Əmirlikləri, Yaponiya, Almaniya və Yunanıstan olduğunu qeyd edib.
Qeyd edək ki, 2020-ci ilin yanvar-oktyabr ayları ərzində Azərbaycandan 173 milyon ABŞ dolları məbləğində pomidor ixrac edilib. Pomidorin böyük hissəsi Rusiyaya göndərilib.
