AzTU-da struktur dəyişiklikləri edilib
Azərbaycan Texniki Universitetinin (AzTU) Elmi Şurasının növbəti onlayn iclası keçirilib.
Universitetdən verilən məlumata görə, iclasın gündəliyinə uyğun olaraq, AzTU-da bir sıra struktur dəyişiklikləri edilib.
Universitet üzrə aparılan optimallaşdırmanı nəzərə alaraq, Tədris hissəsinin “Tədris işlərinin təşkili” və “Keyfiyyətin təminatı” şöbələrinin birləşdirilməsi və onların bazasında “Tədris işlərinin təşkili və keyfiyyətin təminatı” şöbəsinin yaradılması qərara alınıb.
AzTU-da hüquqi işin təşkilini daha keyfiyyətli formada həyata keçirmək üçün Hüquq Sektorunun yaradılması barədə qərar qəbul olunub. İclasda həmçinin Magistratura və doktorantura şöbəsinin bazasında Magistratura və Doktorantura şöbələrinin yaradılması ilə bağlı razılığa gəlinib. Bundan başqa, AzTU-nun nəzdində "Gənc texniklər" İnternet Liseyin yaradılması və universitetin publik hüquqi şəxs statusu alması ilə bağlı işlərin icrasına başlanılıb.
