Şəxsi tutum

Sığorta riskinin sığortaçının təkrarsığorta etdirmədiyi və yalnız öz üzərinə götürdüyü hissəsi.

Misal:

Sığortaçının fərdi qəza sığorta müqavilələri üzrə qəbul etdiyi risklərin ümumi həcmi 10 000 000 manat təşkil edir və bu risklərin 6 500 000 manat hissəsi təkrarsığorta etdirilmişdir. Qalan 3 500 000 manat məbləğində risklər isə sığortaçının fərdi qəza sığortası üzrə şəxsi tutumu hesab olunur.

«Sığorta fəaliyyəti haqqında» Azərbaycan Respublikasının 2007-ci il 25 dekabr tarixli Qanunu,

maddə 1.1.22: şəxsi tutum – sığorta və ya təkrarsığorta müqaviləsinə əsasən sığorta riskinin sığortaçının (təkrarsığortalının) öhdəliyində qalan hissəsi.

maddə 79.6: Sığortaçının bir sığorta predmeti üzrə sığorta riskləri ilə bağlı şəxsi tutumunun həcmi onun məcmu kapitalının 10 faizindən çox olmamalıdır.

maddə 79.7: Bu Qanunun 79.6-cı maddəsinin tələbi nəzərə alınmaqla, sığortaçının əmlak sığortasına aid bir sığorta müqaviləsi üzrə risklərlə bağlı şəxsi tutumunun həcmi onun məcmu kapitalının 30 faizindən çox olmamalıdır.

Beynəlxalq Sığorta Nəzarətçiləri Assosiasiyasının «Sığorta Terminləri lüğəti» (2005), səh.45:

Xalis tutum (_eng.–net retention)–özündə saxlamaq istəmədiyi risk məbləğinin təkrarsığorta etdirilməsindən sonra şirkətin öz üzərində saxladığı sığorta məbləği.

Qazaxıstan Respublikasının 2000-ci il 18 dekabr tarixli “Sığorta fəaliyyəti haqqında” Qanunu,

maddə 3: şəxsi tutum (_рус.– собственное удержание)– sığorta və ya təkrarsığorta müqaviləsinə uyğun olaraq öhdəliyin sığortaçının və ya təkrarsığortalının (sedentin) öz hesabına məsuliyyət daşıdığı hissəsi.

maddə 46, bənd 5: Sığortaçının (təkrarsığortaçının) bir sığorta və ya təkrarsığorta müqaviləsi üzrə şəxsi tutumunun ən yuxarı məbləği aktuari tərəfindən hesablanmalı və ödəmə qabiliyyəti səviyyəsinin faktiki məbləğini aşmamalıdır.