A-dan Z-yə terminlər (103)
A   B   C   Ç   D   E   Ə   F   G   Ğ   H   X   I   J   K   Q   L   M   N   O   Ö   P   R   S   T   U   Ü   V   Y   Z   Filtri ləğv et

Sığorta əməliyyatları

Sözün izahı

Sığorta və ya təkrarsığorta müqavilələrinin bağlanmasına və yerinə yetirilməsinə yönəldilən əməliyyatlar, o cümlədən sığorta və sığorta vasitəçiliyi xidmətlərinin, habelə sığorta sahəsində yardımçı fəaliyyət göstərən hüquqi şəxslər tərəfindən sığorta və ya təkrarsığorta risklərinin və zərərlərin qiymətləndirilməsi, sığorta hadisələrinin araşdırılması, zərərlərin tənzimlənməsi ilə bağlı xidmətlərin göstərilməsi ilə əlaqədar həyata keçirilən əməliyyatlar.

Misal və əlavə izahat:

Şəxs sığortaçı ilə mənzil sığortası müqaviləsi bağlamışdır. Həmin müqavilənin sığortaçı tərəfindən bağlanmasına yönəlmiş fəaliyyət, bu, istər sığortaçının öz mütəxəssisinin, istərsə də sığorta agentinin və ya brokerinin fəaliyyəti olsun, sığorta əməliyyatlarının tərkib hissəsidir. Sığorta hadisəsinin baş verdiyi halda da sığortaçının əməkdaşının, yaxud sığortaçının adından hadisəni araşdıran nümayəndənin hadisə yerinə baxış keçirməsi, dəymiş zərərlə bağlı sənədləşdirməni aparması və zərəri qiymətləndirməsi də sığorta əməliyyatlarına aid edilir.

Azərbaycan Respublikasının qanunvericiliyinə istinad

Azərbaycan Respublikasının qanunvericiliyində ”sığorta əməliyyatları”nın anlayışı nəzərdə tutulmamışdır.

"Sığorta fəaliyyəti haqqında” Azərbaycan Respublikasının Qanunu,

maddə 83.2: Fiziki şəxs müvafiq sığorta vasitəçiliyi üzrə fəaliyyətə lisenziya almaq üçün aşağıdakı tələblərə cavab verməlidir:

sığorta əməliyyatlarına nəzarət etmək, istiqamətləndirmək və ya cəlb etmək üçün məcbur etmə, təzyiq və ya təsir göstərmə imkanı verən mövqeyə malik olmaması.

maddə 123.2: Sığortaçılar və sığorta vasitəçiləri onlar tərəfindən həyata keçirilən sığorta əməliyyatlarına dair sənədləri…qanunvericilikdə nəzərdə tutulmuş müddətdə saxlamalı və zərurət yarandığı təqdirdə səlahiyyətli dövlət orqanına təqdim etməlidirlər.

Beynəlxalq təcrübədən nümunə

Fakov V. Y. “Sığorta. İngiliscə-rusca və rusca-ingiliscə lüğət”; Moskva “Beynəlxalq münasibətlər” – 2007:

Sığorta əməliyyatları (рус.–cтраховые операции)– sığorta üzrə əməliyyatlar.

Rusiya Federasiyasının Vergi Məcəlləsi, II Hissə - 2000-ci il, maddə 149, 3-cü bənd, 7)-ci yarımbənd, ikinci abzas:

Bu maddənin məqsədləri üçün sığorta, şərikli sığorta və təkrarsığorta üzrə əməliyyatlar o əməliyyatlar sayılır ki, bunun nəticəsində sığorta təşkilatı

  • təkrarsığortaçının ödədiyi komissiyalar (o cümlədən tantyema) daxil olmaqla, sığorta, şərikli sığorta və təkrarsığorta müqavilələri üzrə sığorta haqları,
  • təkrarsığorta müqaviləsi üzrə sığorta haqqının üzərinə hesablanan və təkrarsığortalının təkrarsığortaçıya ödədiyi faizlər,
  • sığortaçıların adından və onların tapşırığı əsasında müəyyən olunmuş qaydada şərikli sığorta müqaviləsi bağlamış sığorta təşkilatı tərəfindən alınan sığorta haqları,
  • sığortalıya vurulan zərərə görə məsuliyyət daşıyan şəxsdən subroqasiya qaydasında sığortaçı tərəfindən alınan vəsaitlər əldə edir.

www.glossary.ru internet saytı:

Sığorta əməliyyatları – sığorta təşkilatlarının sığortanın həyata keçirilməsi ilə birbaşa bağlı olan bütün növ fəaliyyətlərinin məcmusu…Sığortalı ilə bilavasitə əlaqəsi olmayan işlər – investisiya fəaliyyəti, dövlət büdcəsi və ya banklarla qarşılıqlı münasibətlər, işçilərin əməyinin ödənilməsi sığorta əməliyyatlarına aid edilmir.