Sığorta tarifi

Sığorta haqqının hesablanması üçün sığorta predmetinin və sığorta riskinin xarakteri nəzərə alınmaqla sığorta məbləği vahidinə tətbiq edilən müvafiq dərəcə.

Misal:

Şəxs sığorta şirkətinə gəlir və mənzilini 30 000 manat məbləğində sığorta etdirmək niyyətini bildirir. Yəni onun mənzilinə sığorta müddəti ərzində müəyyən risklərdən dəyə biləcək zərərlərin əvəzinin həmin məbləğ həddində sığortaçı tərəfindən ödənilməsini istəyir. Sığortaçı ona bildirir ki, mənzillərin sığortaçı üçün ilk dəfə müraciət edən müştərilərinə 0,6% sığorta tarifi müəyyən edir. Beləliklə, şəxs sığorta təminatı almaq istədiyi məbləğ (30 000 manat) üçün 180 manat (30 000x0,6%=180 manat) sığorta haqqı ödəməli olur.

«İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında» Azərbaycan Respublikasının 2010-cu il 11 may tarixli Qanunu, maddə 2.0.17:

sığorta tarifi - icbari sığorta müqaviləsi üzrə sığorta haqqının hesablanması üçün bu Qanuna uyğun olaraq müəyyən olunan əmək haqqı fonduna tətbiq olunan faiz dərəcəsi.

“İcbari ekoloji sığorta haqqında” Azərbaycan Respublikasının 2002-ci il 12 mart tarixli Qanunu, maddə 10.2:

İcbari ekoloji sığorta üçün sığorta tarifinin minimum faiz dərəcəsi bu Qanunun 9.5 və 9.6-cı maddələrində müəyyən edilmiş minimum sığorta məbləğinin 2 faizini təşkil edir.

Rusiya Federasiyanın 1992-ci il 27 noyabr tarixli “Rusiya Federasiyasında sığorta işinin təşkili haqqında” Qanunu, maddə 11:

Sığorta tarifi (_рус.–страховой тариф) – sığorta obyekti və sığorta riskinin xarakteri nəzərə alınmaqla sığorta haqqının sığorta məbləğinə olan faiz nisbəti.

Rusiya Federasiyasının Mülki Məcəlləsi, II Hissə - 1996-cı il, maddə 954, bənd 2:

Sığortaçı sığorta müqaviləsi üzrə ödənilməli olan sığorta haqqının həcmini müəyyənləşdirərkən sığorta obyekti və sığorta riskinin xarakteri nəzərə alınmaqla sığorta məbləği vahidinin əsasında işləyib hazırladığı sığorta tariflərini tətbiq etmək hüququna malikdir.

Türkiyə Cümhuriyyətinin 2007-ci il 3 iyun tarixli Sığortaçılıq Qanunu, maddə 12, (1):

Sığorta tarifləri (_eng.–insurance tariffs) sığortanın prinsiplərinə və ümumqəbuledilmiş aktuar metodlarına əsasən sığorta şirkətləri tərəfindən sərbəst müəyyən edilir. Lakin bu Qanunda və digər qanunlarda nəzərdə tutulmuş icbari sığortalar üzrə təminat məbləğləri, tariflər və təlimatlar isə Nazirlik tərəfindən müəyyən edilməklə Qəzetdə dərc olunur.