Xidmət haqqı almaq yerinə onu seçdiyiniz üçün sizə ödəniş edir - İNQİLABİ YENİLİK

"Apple"ın yeni məhsullarından biri "Apple Card"dır. Üzvlük ödənişi olmayan və "Wallet" tətbiqi üzərindən idarə olunan bu kredit kartı ilə edilən alış-verişlərdə "xərclədikcə pul qazan" sistemi aktiv olaraq istifadə ediləcəkdir. "Apple Pay" qəbul edilən hər yerdə "Apple Card" etibarlı olacaqdır. Kartın titandan hazırlanacaq fiziki versiyası da təqdim ediləcəkdir. Üzərində hər hansı bir məlumat olmayan bu kart yenə "Wallet" tətbiqi ilə idarə olunacaq.

ABŞ-ın "Apple" şirkəti yeni "Apple Card" məhsulunu təqdim edib.

"BI" xəbər verir ki, təqdimatda şirkətin İcraçı direktoru Tim Kuk çıxış edərək "Apple Pay"ın bu il 10 milyard dollar əməliyyat həcmini keçəcəyini bildirib. O qeyd edib ki, Amerika Birləşmiş Ştatlarının 70%-ində "Apple Pay" istifadə etmək mümkündür. Bu nisbət Avstraliyada 99%-ə çatmış vəziyyətdədir. Hələ bir çox ölkədə istifadə edilə bilinməyən "Apple Pay" bu ilin sonuna qədər 40-dan çox ölkədə istifadəyə təqdim ediləcək.

İnqilabi bir məhsul olan "Apple Pay" təcrübəsini inkişaf etdirmək istədiklərini qeyd edən Tim Kuk, ən yeni məhsulları olan "Apple Card"ı təqdim edib.

Sonra məhsulun xüsusiyyətləri haqqında detallı məlumat verilməsi üçün sözü "Apple Pay" məsulu üzrə direktor köməkçisi Jennifer Bailey alıb.

Bütün "Apple" məhsulları ilə inteqrə olunmuş şəkildə çalışacaq "Apple Card"dan istifadə etmək üçün "iPhone" ilə üzv olmağınız kifayətdir. Bailey, "telefonunuzla hər yerdə istədiyiniz kimi istifadə edə biləcəksiniz. Bu da kartınızı itirmək qorxusunu ortadan qaldıracaq" deyib.

Rahat bir maliyyə həyatınızın olmasını hədəfləyən "Apple Card", "iPhone" üzərindən birbaşa mesajlar ilə "Apple Card"ınız üzərindəki hər hansı bir dəyişikliyi etmənizə imkan verir. 

Bütün ödəmələrinizi avtomatik olaraq kateqoriyalara ayıran "Apple Card", "Apple Maps" ilə inteqrə bir şəkildə çalışır. Xərcləmə etdiyiniz kateqoriyalar ayrı rənglərlə qeyd edildiyi üçün maliyyə hesablarınızı və ya araşdırmalarınızı asanlıqla apara biləcəksiniz.

"Daily Cash" xüsusiyyəti sayəsində "Apple Card" ilə pul xərcləyərkən pul qazana biləcəksiniz. Xərclədiyinizə müvafiq olaraq hər gün pul qazanacağınız bu modeldə qazandığınız şey bal deyil, gerçək pul olduğu üçün yenə istədiyiniz kimi xərcləyə biləcəksiniz. Modelin iş prinsipi belədir: Gündəlik standart xərcləmələrinizin 2%-i qədər gündəlik pul qazanacaqsınız. Apple məhsulları aldığınız zaman isə xərclədiyiniz pulun 3%-i qədər pulu geri qazana biləcəksiniz. Üstəlik gündəlik qazanma limiti yoxdur.

Digər bank kartlarının əksinə "Apple Cash" hər hansı bir istifadə ödənişi tələb etmir lokal və qlobal istifadələr də buna daxildir. "Daily Cash" xidmət haqqı almaq yerinə onu seçdiyiniz üçün sizə ödəniş edir.

"Apple Card" aləti, "Goldman Sachs" və "Mastercard" ilə əməkdaşlıq edilərək yaradılmışdır. Kartın əhəmiyyətli bir xüsusiyyəti də gizlilik və təhlükəsizlikdir. Təhlükəsizliyə çox önəm verdiklərini qeyd edən Bailey, istifadəçilərin "Apple Card"ı "Touch ID" və "Face ID" ilə istifadə edəcəklərini qeyd edib. Bu sayədə telefonunuza bir şey olsa belə kartınızın istifadə edilə bilməsi çox çətin olacaqdır.

"Apple" harada nə aldığınızı və nə qədər xərclədiyinizi öz serverlərində saxlamır və "Goldman Sachs" ilə bərabər çalışan Apple məlumatlarınızı üçüncü şirkətlərlə paylaşmayacağını bəyan edir.

​"Apple Card"ın titandan hazırlanmış fiziki kart versiyası da olacaqdır. Kartın üzərində hər hansı bir kart nömrəsi, cv və ya imza yoxdur. Bu səbəbdən olduqca etibarlı görünür. Bu kartı istifadə edərək dünyanın hər hansı bir yerində edəcəyiniz alış-verişlərdə 1% geri qazanacaqsınız.

Bu yay ABŞ-da istifadəyə təqdim ediləcək bu xidmətin nə vaxt Azərbaycanda çalışacağı bilinmir.