Neft ucuzlaşdı (16.07.2026)
Londonun ICE birjasında "Brent" markalı neftin 2026-cı ilin sentyabr ayı üzrə fyuçerslərinin qiyməti 0.54%-dən çox azalıb.
Birja məlumatlarına əsasən, "Brent" markalı neftin bir barelinin qiyməti 84.48 dollara enib.
Eyni zamanda, WTI markalı neftin 2026-cı ilin avqust ayı üzrə fyuçersləri də 0.28% ucuzlaşaraq bir barel üçün 79.37 dollara çatıb.
Çərşənbə günü ABŞ İran limanlarına yenidən dəniz blokadası tətbiq etdikdən sonra İranın sahil müdafiə sistemlərinə və raket obyektlərinə zərbələr endirdi. İran ABŞ ilə "mövcudluq müharibəsində" olduğunu və bölgədən enerji ixracına əlavə məhdudiyyətlər tətbiq etməklə hədələyərək cavab verdi.
Neft qiymətləri bu həftə müharibə başlamazdan əvvəl dünya neft və mayeləşdirilmiş təbii qaz (LNG) ticarətinin təxminən beşdə birini idarə edən Hörmüz boğazında təchizat fasilələrinin dərinləşməsi səbəbindən yüksəlib.
İran və ABŞ arasında münaqişə ötən həftə yenidən alovlanıb və aylarla davam edən döyüşlərdən sonra iyun ayında əldə edilən kövrək atəşkəsi zəiflədib.
Analitiklər qeyd edirlər ki, İran Yəməndəki husi müttəfiqlərindən istifadə edərək Qırmızı dənizə aparan Bab əl-Məndəb boğazını bağlaya biləcəyinə işarə edib. Belə bir addım Vaşinqtona qarşı yeni bir cəbhə aça və dünyanın ən vacib iki enerji tranzit nöqtəsini təhlükə altına qoya bilər.
Goldman Sachs proqnozlaşdırıb ki, Körfəz bölgəsindən ixracın bərpası gecikməyə davam edərsə, Brent markalı neftin qiyməti dördüncü rübdə 110 dollardan yuxarı qalxa bilər. Lakin bank bildirib ki, gərginlik azalarsa və hasilat gözləniləndən daha tez bərpa olunarsa, ilin sonuna qədər qiymətlər təxminən 60 dollara düşə bilər.
Bu arada, ABŞ Enerji İnformasiya Administrasiyası (EIA) 10 iyulda bitən həftə xam neft ehtiyatlarının 1,7 milyon barel azaldığını bildirib. Analitiklər 2,6 milyon barel azalma gözləyirdilər.
