Dünya birjalarında neft bahalaşıb (01.08.2025)
Londonun ICE birjasında "Brent” markalı neftin fyuçerslərinin qiyməti 0.09% artaraq 71.87 dollar/barel olub.
ENA.az xəbər verir ki, Nyu-Yorkun NYMEX əmtəə birjasında WTI markalı neftin bir barelinin qiyməti isə 0.11% artaraq 69.43 dollar təşkil edib.
Neft əvvəlki sessiyada yüzdə 1-dən çox ucuzlaşdıqdan sonra cümə günü əsasən dəyişməz qalıb. İnvestorlar hesab edirlər ki, ABŞ-ın tətbiq etdiyi yeni və daha yüksək tariflər iqtisadi fəallığı yavaşlata və qlobal yanacağa tələbat artımını azalda bilər.
Yenə də Brent-in bu həftəni 4,9 faiz, WTI-nin isə 6,4 faiz artımla bağlayacağı gözlənilir. Bu artıma səbəb ABŞ prezidenti Donald Trampın bu həftənin əvvəlində Rusiyaya Ukraynadakı müharibəni dayandırması üçün təzyiq etmək məqsədilə Rusiya neft alıcılarına, xüsusən də Çin və Hindistana tariflər tətbiq etməklə hədələməsi olub.
Lakin cümə günü investorların diqqəti Trampın ABŞ-ın ticarət tərəfdaşlarına əsasən artırılan yeni tariflər barədə açıqlamasına yönəldi.
Tramp cümə axşamı günü Kanada, Hindistan və Tayvan da daxil olmaqla bir neçə ölkə və regiondan ABŞ-a idxal edilən mallara 10%-dən 41%-ə qədər tariflər tətbiq edən sərəncam imzalayıb. Bu ölkələr Trampın təyin etdiyi 1 avqust tarixinə qədər ABŞ ilə ticarət sazişi imzalaya bilməyib.
