Çin ABŞ-nin yeni tariflərini tənqid edib

Çin Ticarət Nazirliyi ABŞ-nin yeni tariflərindən narazılığını ifadə edərək, onların illərlə davam edən ticarət danışıqları nəticəsində əldə edilən maraqlar balansına məhəl qoymadığını bildirib. Bu barədə idarənin rəsmi saytında dərc olunmuş məlumatında deyilir.

Sənəddə vurğulanır ki, Amerika hakimiyyəti beynəlxalq ticarətdə iddia edilən itkilərə istinad edir və “qarşılıqlılıq” arqumentindən istifadə edərək bütün ticarət tərəfdaşları üçün rüsumları artırır.

Nazirlik hesab edir ki, bu yanaşma əldə edilmiş maraqlar balansını pozur və ABŞ-nin uzun müddətdir beynəlxalq ticarətdən əhəmiyyətli dərəcədə faydalanmasına məhəl qoymur.

Aprelin 2-də ABŞ prezidenti Donald Tramp aprelin 9-dan etibarən Amerika ticarət tərəfdaşlarına “qarşılıqlı tariflər” tətbiq edən sərəncam imzalayıb. Tarif siyahısına onlarla ölkə, o cümlədən Çin daxildir. Cənab Trampın sözlərinə görə, tariflər Amerika malları üzərində “valyuta manipulyasiyası və ticarət maneələrinə” cavabdır.