Azərbaycan "Boz siyahı"da deyil. Bu siyahıya düşmək asan, oradan çıxmaq 2 dəfə çətindir
Bu gün Azərbaycan birlikdə qiymətləndirildiyi Avropa ölkələrinin 31 %-dən fərqli olaraq "boz siyahı"da deyil.
Bunu Maliyyə Monitorinqi Xidmətinin (MMX) İdarə Heyətinin sədri Zaur Fətizadə Bakıda keçirilən, “Konstitusiya və Suverenlik İli”nə həsr edilmiş "Maliyyə nəzarəti - dövlətin və özəl sektorun konstitusion hüquqlarının qorunmasının təminatçısı kimi" mövzusunda konfransda bildirib.
"Biz 2023-cü ildə ölkə qiymətləndirilməsinin 5-ci mərhələsini keçmişik və uğurlu nəticələr əldə etmişik. "Boz siyahı"ya düşmək ümumi daxili məhsulun (ÜDM) 7,6 %, xarici investisiyaların 3 % azalması, bankların müxbir əlaqələrinin kəsilməsi, tranzaksiyaların müddətinin uzanması, ölkənin maliyyə sektorunun çox ciddi zərbələr alması ilə nəticələnə bilər. "Boz siyahı"ya düşmək asan, oradan çıxmaq 2 dəfə çətindir. Bu səbəbdən MMX bu prosesləri daim koordinasiya edir", - deyə o qeyd edib.
