Azərbaycanlı Əbu-Dabinin ən məşhur qəhvəçisidir - FOTO

Ömrü boyu çay içmiş azərbaycanlı neft mühəndisi Cavid ilk dəfə qəhvəni Rusiyada dadıb və bu, onun həyatını dəyişib. Neft sahəsində işləmək üçün Əbu-Dabiyə köçən Cavid şəhərin hazırda ən məşhur kafelərindən sayılan “42 Coffee Roasters” “qəhvə evi”ni açıb.

Cavid haqqında “Abu Dhabi World” nəşrində geniş məqalə dərc olunub.

Azərbaycanlı mühəndis Birləşmiş Ərəb Əmirliyindəki uğur hekayəsini nəşrə danışıb.

“Əslim azərbaycanlıdır. Gənc olanda yalnız satışda olan qəhvənin dadına baxmışdım. Heç xoşum gəlməmişdi. Dadı acı idi. Düşünmürdüm ki, qəhvə belə dadlı ola bilər. Sözün düzü, əvvəllər həmişə çaya üstünlük vermişəm.

Günlərin bir günü, təxminən yeddi il əvvəl Moskvaya gedəsi oldum. Hava çox soyuq idi, isinmək üçün kafeyə daxil olub, bir fincan çay istədim. Ancaq onlar çay vermirdilər. Yanımdakı müştərinin başqa bir şey içdiyini gördüm. Qəhvəyə bənzəmirdi. Sonradan öyrəndim ki, bu V60 üslubunda hazırlanan qəhvədir. Birincini içib qurtarmamış ikincini sifariş verdim”, - deyə Cavid bildirib.

Onun sözlərinə görə, həmin təəssüratdan sonra ABŞ-dan balaca qəhvəüyüdən cihaz alıb və qəhvəsini özü hazırlamağa başlayıb. Cihazı özü ilə iş yerinə (neft platformasına) apararaq, asudə vaxtlarında qəvhə dənələrinin qızardılması ilə bağlı “sınaqlar” keçirib.

“Əvvəl heç nə alınmırdı, səylərim arzuolunan nəticəni vermirdi, ancaq bir gün məndə alındı. Tezliklə hazırladığım qəhvəm faktiki olaraq ətrafımda olan bütün insanların xoşuna gəlməyə başladı. Hər dəfə ən yaxşı qəhvəni hazırlayıb, özüm üçün yeni bir şey kəşf edirəm”, - deyə Cavid söyləyib.

Bir müddətdən sonra Əbu-Dabidə hazırda ölkənin ən populyar kafelərindən sayılan “42 Coffee Roasters” qəhvəxanasını açıb.

“Mən kafemdə insanların yeni dadları sınaqdan keçirməsini istəyirəm. Müştərilərə qəhvəni özüm gətirib, onlardan dadının necə olduğunu soruşuram. Burada əsas olan pul yox, dostluqdur. Müştərilər, eyni zamanda, kiçik biznesin inkişafına yardım olurlar”, - deyə Cavid vurğulayıb.