İpoteka kreditlərinə tələb azalıb - SORĞU
Biznes kreditləri üzrə kredit standartlarında dəyişiklik olmasa da, mikro sahibkarlıq subyektləri üzrə standartlarda yumşalma nəzərə çarpıb. ENA.az xəbər verir ki, Azərbaycan Mərkəzi Bankının keçirdiyi sorğuda iştirak edən banklar növbəti rübdə də kredit standartlarında yumşalmanın davam edəcəyini gözlədiklərini bildiriblər.
"Cari rübdə biznes kreditlərinə tələb azalmışdır. Banklar növbəti rübdə sektorda biznes kreditlərinə tələbdə artım olacağı qənaətindədirlər. Sorğu nəticələrinə əsasən ötən rübdə olduğu kimi ipoteka kreditləri üzrə standartlarda sərtləşmə olmuşdur. İpoteka kreditləri üzrə standartlarda sərtləşmə həm daxili ipoteka kreditlərində, həm də İKZF hesabına verilən kreditlərdə müşahidə edilmişdir. Banklar ipoteka kreditlərinə tələbin azaldığını bildirmişlər", - deyə bildirilir.
Tələbdə azalma əsasən daxili ipoteka ilə verilən kreditlər üzrə olub. Banklar növbəti rübdə ipoteka kreditləri üzrə kredit standartlarında yumşalma və kredit tələbində artım olacağını gözləyirlər.
Sorğu nəticələrinə əsasən 2024-cü ilin I rübündə cəmi istehlak kreditləri üzrə kredit standartlarında dəyişiklik müşahidə edilməyib. Sektorda istehlak kreditləri üzrə tələbdə artım tempi səngisə də, yüksək olaraq qalmaqdadır. Banklar növbəti rübdə istehlak kreditləri üzrə standartlarda yumşalma, tələbdə isə artımın davam edəcəyi qənaətindədirlər.
