Avropalı investorlar Azərbaycanın dövlət istiqrazlarını əldə edib
İngiltərənin bir bankı, eləcə də Polşadan olan investorlar Azərbaycanın dövlət istiqrazları bazarında aktiv fəaliyyətə başlayıblar.
Bunu Maliyyə Nazirliyinin istiqrazlarının yerləşdirilməsi üzrə anderrayter - "PAŞA Kapital İnvestisiya Şirkəti" QSC-nin İdarə Heyətinin sədri Ceyhun Hacıyev keçirdiyi mətbuat konfrasında bildirib.
"Hazırda biz həmin investorlara vasitəçilik xidmətləri göstəririk. İnanırıq ki, Milli Depozit Mərkəzi öz platformasını beynəlxalq depozit mərkəzlərinə inteqrasiya etdikdən sonra daha çox xarici investor Azərbaycan bazarına daxil olacaq", - deyə o qeyd edib.
C.Hacıyev onu da qeyd edib ki, "Əmanətlərin sığortalanması haqqında" qanuna investisiya şirkətləri üzrə yatırımların sığortalanması ilə bağlı dəyişiklik layihəsi hazırlanıb. Onun sözlərinə görə, hazırda qanun layihəsi müvafiq tərəflərlə müzakirə olunur. Nəzərdə tutulan dəyişiklik, investisiya şirkəti iflas olarsa, onun müştərilərinin aktivlərinin bərpası ilə əlaqədardır. Qiymətli kağızların emitentinin iflası nəticəsində müştərilərin investisiyalarının sığortalanması isə nəzərdə tutulmur.
