Milton qasırğası 100 milyard dollara başa gələ bilər
ABŞ-da "keçən əsrin ən güclü qasırğası" olacağı barədə günlərdir xəbərdarlıq edilən Milton qasırğası Florida ştatının qərb sahillərinə çatıb.
Helene qasırğasından sonra bölgəni vuran Milton qasırğasının zərərinin 100 milyard dollara çatacağı gözlənilir.
4-cü kateqoriya olması gözlənilən fırtına, Meksika körfəzi üzərində şaquli küləyin toqquşması səbəbindən 3-cü kateqoriyaya çevrilib.
ABŞ Milli Qasırğa Mərkəzinin hesabatına görə, iki həftə əvvəl baş verən Helene qasırğasının ziyanı 112 milyard dollar olub.
Enki Research-dən Chuck Watson, Miltondan dəyən zərər və itkilərin 60-75 milyard dollara çatacağını təxmin edir. Bəzi analitiklər Milton qasırğasının qlobal sığorta sənayesi üçün 100 milyard dollara qədər itkiyə səbəb ola biləcəyini bildiriblər.
