Texpasportda mühərrikin nömrəsi yazılmayıbsa problemi kim həll etməlidir - DYP yoxsa sürücü?
Avtomobilini qeydiyyata qoyan şəxs Baş Dövlət Yol Polisi İdarəsində problemlə üzləşib. ENA.az xəbər verir ki, bu barədə oxucu Avtosfer.az-a şikayətini bildirib. Onun sözlərinə görə, qeydiyyat şəhadətnaməsində mühərrik nömrəsi yazılmadığı üçün qeydiyyatdan imtina edilib: “Avtomobilin təkrar qeydiyyatı üçün Qeydiyyat-İmtahan İdarəsinə yaxınlaşdım. Qeydiyyat şəhadətnaməsində mühərrik nömrəsi qeyd olunmadığı üçün yaxındakı təmir boksunda avtomobilə baxış keçirildi, lakin mühərrikin nömrəsini tapa bilmədilər. Bildirdilər ki, servisdən arayış gətirməlisən. Mühərrikin zavoddan nömrəsiz buraxılması haqqında arayışı servisdən alıb yenidən DYP-yə yaxınlaşdım. Birinci otaqda olan polis zabiti qeydiyyat şəhadətnaməsini aldı və digər otağa yaxınlaşmalı olduğumu, oradan isə qeydiyyat şəhadətnaməsi ilə birlikdə rəy alacağımı dedi. 6 saatdan artıq gözlədikdən sonra həmin otaqda adını bildirməyən mayor rütbəli zabit qeydiyyat şəhadətnaməsini vermədi və mühərrikin nömrəsinə, həmçinin avtomobilin qapısında olmayan birkaya görə istintaq araşdırmaları aparılmalı olduğunu bildirdi. Servis sənədini təqdim etsəm də nəzərə alınmadı” – deyə oxucu bildirib.
Qeyd edək ki, son zamanlar əksər sürücülər belə problemlərlə üzləşirlər. Məsələnin maraqlı tərəfi burasındadır ki, dəfələrlə qeydiyyata alınan avtomobili bir müddətdən sonra təkrar qeydiyyata təqdim edən zaman sənəddə mühərrik nömrəsinin olmadığını bildirirlər. Sual yaranır ki, əvvəlki qeydiyyatlar zamanı mühərrikin nömrəsini sənədə niyə yazmayıblar və ya mühərrikin nömrəsiz olmasını sənəddə niyə qeyd etməyiblər?
Bəs bu haqda qanunvericilik nə deyir?
Avtomobilin qeydiyyatı zamanı sənəddə hansısa məlumatın yanlış yazılması, o cümlədən ümumiyyətlə məlumatın yazılmamasının məsuliyyətini dövlət orqanı daşıyır. Avtomobil ilkin qeydiyyata təqdim edilən zaman mühərrikin nömrəsiz olması aşkar olunduqda qeydiyyat şəhadətnaməsinə “nömrəsiz” sözü yazılmalıdır. Bunu vaxtilə sənədə yazmayıb həmin hissəni boş saxlamaqla sonradan sürücüyə qarşı problemlər yaşadılması düzgün deyil. Hətta “Yol hərəkəti haqqında” qanunun 28-ci maddəsinin V hissəsində qeyd olunub ki, nəqliyyat vasitəsi qeydiyyata alındıqdan sonra qeydiyyat şəhadətnaməsindəki yazılarda dəqiqsizliyə yol verilmişdirsə, nəqliyyat vasitəsinin qeydiyyat şəhadətnaməsi nəqliyyat vasitəsi sahibindən dövlət rüsumu alınmadan müvafiq dövlət orqanının hesabına dəyişdirilir. Bu maddəyə əsasən həmin problemlə üzləşmiş şəxslər heç bir məsuliyyət daşımır. Bütün məsuliyyət qeydiyyat əməliyyyatını aparan orqanın üzərindədir.
